Зяленскі назваў ЗША наступным пасля Абу-Дабі месцам перамоваў

• 5.02.2026, 21:20

Прэзідэнта Украіны праінфармавалі пра вынікі другога раўнда расійска-ўкраінскіх перамоваў.

Наступная сустрэча для абмеркавання мірнага ўрэгулявання адбудзецца, хутчэй за ўсё, у Злучаных Штатах. Пра гэта заявіў прэзідэнт Украіны Уладзімір Зяленскі.

Ён паведаміў, што члены дэлегацыі праінфармавалі яго пра вынікі другога раўнда расійска-ўкраінскіх перамоваў пры пасярэдніцтве ЗША ў Абу-Дабі. Падрабязную інфармацыю прэзідэнт атрымае пасля іх прылёту ва Украіну, бо «многія аспекты немагчыма абмеркаваць па тэлефоне».

«З таго, што ўжо можна сказаць, — у найбліжэйшы час плануюцца наступныя сустрэчы. Верагодна, у Амерыцы», — працягнуў Зяленскі.