Пуціна папярэдзілі пра надыход у РФ маштабнага эканамічнага крызісу
- 5.02.2026, 19:30
Крызіс можа надысці ўжо летам.
Падсілкаваная трыльённымі выдаткамі на дзяржаўны абаронны заказ і выплатамі завербаваным на фронт, ваенная эканоміка Расіі падыходзіць да кропкі злома.
Чыноўнікі фінансавага блоку ўрада папярэдзілі прэзідэнта Уладзіміра Пуціна, што ўжо ў найбліжэйшыя месяцы ў краіне можа разгарэцца эканамічны крызіс. Пра гэта паведамляе The Washington Post са спасылкай на крыніцу, якая знаходзіцца ў непасрэдным кантакце з гэтымі чыноўнікамі.
Па словах суразмоўцы WaPo, папярэджанні Пуціну становяцца ўсё больш настойлівымі, а крызіс, на думку чыноўнікаў, можа надысці ўжо летам. Пуціна папярэдзілі, што без далейшага павышэння падаткаў дэфіцыт бюджэту будзе і далей расці з-за падзення нафтагазавых даходаў, а банкаўская сістэма знаходзіцца пад нарастаючым ціскам праз высокія працэнтныя стаўкі і вялікі аб’ём крэдытаў для фінансавання вайны, піша WaPo.
Да надыходу крызісу засталося «тры–чатыры месяцы», — сказаў выданню адзін з маскоўскіх бізнесменаў. Па яго словах, з’яўляецца ўсё больш прыкмет інфляцыі, значна вышэйшай за дэклараваныя ўладамі 6%, нягледзячы на рэкордна жорсткую палітыку ЦБ РФ з ключавой стаўкай у 16%. На будучы крызіс таксама ўказваюць вымушаныя звальненні тысяч рабочых і рэкордная ад часу пандэміі хваля закрыццяў рэстаранаў і бараў у Маскве, — паведаміла крыніца WaPo.
Пасля двух гадоў ваеннага буму, калі ВУП рос больш чым на 4% у год, расійская эканоміка ўпала ў цяжкую дэпрэсію. Мінулы год рост запаволіўся да 1%, з 28 грамадзянскіх галін прамысловасці 20 пачалі падаць, а кампаніі — ад малых да буйных — масава пачалі адчуваць праблемы з пагашэннем даўгу. Паводле даных ЦБ, больш за 10 трлн рублёў крэдытаў на банкаўскіх балансах сталі праблемнымі. Фактычна ў краіне пачаўся латэнтны банкаўскі крызіс, папярэдзілі ў лютым эксперты ЦМАКП.
Расійскі бюджэт, нягледзячы на дзве хвалі павышэння падаткаў, у гэтым годзе можа атрымаць астранамічны дэфіцыт у 10 трыльёнаў рублёў з-за скарачэння закупак нафты Індыяй і зніжак да $30 за барэль (згодна з непублічнымі разлікамі ўрада). А калі кампенсаваць выпадаючыя нафтагазавыя даходы за кошт ФНБ, то давядзецца патраціць амаль усе свабодныя грошы фонду — 4,1 трлн рублёў.
Новаю «сур’ёзнай пагрозай» для Крамля могуць стаць меры Еўрасаюза супраць «ценявога флоту», — паведаміла WaPo крыніца, блізкая да расійскіх дыпламатаў. У студзені 14 краін ЕС падпісалі пагадненне аб сумесных дзеяннях супраць танкераў з фальшывымі сцягамі, фактычна пагражаючы закрыць для Расіі Балтыйскае мора — асноўны канал вывазу нафты за мяжу. У межах 20-га пакета санкцый ЕС хоча цалкам забараніць марскія перавозкі расійскай нафты і спадарожныя паслугі, што паставіць пад пагрозу палову нафтаэкспарту, піша WaPo.
«Гэта пагроза не толькі для эканомікі, але і палітычнае пытанне пра тое, як Расія можа такое дазволіць, не страціўшы палітычнай рэпутацыі», — адзначыла дыпламатычная крыніца выдання. Да таго ж, новыя энергетычныя санкцыі можа ўвесці Дональд Трамп, калі палічыць, што «Расія сабатуе мірны працэс», — дадаў ён.