Магутней за ATACMS і дасягне Масквы: што вядома пра новую ўкраінскую ракету FP-9
- 5.02.2026, 19:15
Зараз ракеты праходзяць фінальныя выпрабаванні.
Украінская абаронная кампанія Fire Point рыхтуе да прыняцця на ўзбраенне балістычныя ракеты FP-7 і FP-9. Новыя распрацоўкі значна таннейшыя за заходнія аналагі, а іх далёкасць дазваляе паражаць стратэгічныя аб’екты ў глыбокім тыле РФ.
Аб гэтым паведамляе РБК-Украіна са спасылкай на інтэрв’ю саўзаснавальнікаў кампаніі Ірыны Тэрэх і Дзяніса Шцілермана для Deutsche Welle.
Паводле слоў распрацоўнікаў, ракета FP-7 з’яўляецца бюджэтным аналагам амерыканскай сістэмы ATACMS. Яна мае далёкасць да 300 км і прызначаная для высокадакладных удараў на кароткіх дыстанцыях.
Больш магутная мадыфікацыя — FP-9 — здольная паражаць мэты на адлегласці 800–850 км і нясе баявую частку масай 800 кг.
«800 кіламетраў — гэта Масква, гэта Пецярбург», — падкрэсліў Шцілерман.
У сваю чаргу Тэрэх адзначыла, што ў адрозненне ад беспілотнікаў або крылатых ракет балістычныя снарады маюць значна вышэйшы шанец прабіць тры контуры СПА вакол расійскай сталіцы.
«Значна лягчэй балістыкай будзе паражаць Маскву. Трэба разумець, што ні крылатыя ракеты, ні беспілотнікі ў нейкай вялікай долі, здольнай нанесці істотную шкоду Маскве або яе інфраструктуры, не даляцяць. Таму адзіная надзея — на балістыку з вялікай хуткасцю трапляння ў мэту. Больш за 1200 метраў у секунду», — заявіла яна.
Зараз ракеты праходзяць фінальныя выпрабаванні. Аднак чакаецца, што кодыфікацыю і афіцыйнае прыняцце на ўзбраенне яны пройдуць ужо ў лютым гэтага года.
Хуткасць распрацоўкі тлумачаць адсутнасцю бюракратыі і спрашчэннем працэдур для абароннага сектара Украіны (маецца на ўвазе, у прыватнасці, пастанова №256 ад сакавіка 2022 года). Для параўнання: аналагічныя праграмы ў Францыі або РФ цягнуліся больш за 15 гадоў.
«Нават краіны з вялікім досведам і магутнай ракетнай праграмай трацілі дзесяцігоддзі, каб стварыць балістычныя ракеты. Францыя, напрыклад, са сваёй балістычнай ракетай М51 патраціла 15 гадоў. С-400 — расійскі комплекс — таксама распрацоўваўся 15 гадоў», — адзначыў Шцілерман.
Прыярытэтам Fire Point на бягучы год з’яўляецца развіццё балістычнага ўзбраення, а ў перспектыве двух-трох гадоў — пабудова процібалістычнага шчыта СПА для ўсёй Еўропы.
Гэта абаронная сістэма будзе функцыянаваць на базе адкрытай архітэктуры, што забяспечыць поўную незалежнасць праграмнага забеспячэння ад канкрэтных вытворцаў або краін.
Адна з ключавых задач праекта — кардынальнае патанненне СПА. Цяпер збіццё адной расійскай ракеты «Іскандэр» абыходзіцца прыкладна ў 6 млн долараў, аднак Fire Point імкнецца знізіць гэты кошт да 1–1,5 млн долараў.
Такога выніку плануюць дасягнуць дзякуючы выкарыстанню ракеты FP-7. Яна з’яўляецца кампазітнай і значна больш таннай версіяй аналагаў сістэмы С-400, мае спрашчанае кіраванне і абаронена ад любога дыстанцыйнага ўмяшання або адключэння.