ДАІ заклікала беларусаў не панікаваць у бліжэйшыя дні

• 5.02.2026, 18:39

Што адбылося?

У ДАІ Брэстчыны заклікалі кіроўцаў не панікаваць на дарогах у бліжэйшыя дні. Рэч у тым, што там магчымыя заносы з-за змены надвор'я — у краіне ўжо цяплее.

Сіноптыкі прагназуюць павышэнне тэмпературы да слабага «плюса». Удзень снег пачне таяць, а ўначы, калі маразы возьмуць сваё, усё будзе пакрывацца ледзяной скарынкай. Гэта «класічныя пасткі» зімы, адзначылі ў ДАІ.

У чым небяспека тонкага лёду

Вонкава ён падобны да лужын або мокрага асфальту, асабліва ў цёмны час сутак. Гэты аптычны падман надзвычай небяспечны для кіроўцаў і пешаходаў.

Не панікаваць і не дапускаць рэзкага тармажэння

Кіроўцам перадусім трэба пазбягаць рэзкіх рухаў. «Пры заносе — не панікаваць і не тармазіць рэзка, каб не дапусціць поўнай страты кантролю», — працягнулі ў ДАІ.

Асноўнымі правіламі бяспекі там назвалі:

зніжэнне хуткасці,

адмову ад рэзкіх манеўраў,

выкарыстанне зімовых шын.

З-за значнага павелічэння тармазнога шляху і пагаршэння кіравальнасці аўтамабіля кіроўцам трэба быць асабліва асцярожнымі пры галалёдзіцы.

Хадзіць «шаркаючымі» крокамі і дастаць рукі з кішэняў

Ёсць у ДАІ таксама правілы для пешаходаў:

надзяваць абутак з рыфлёнай («трактарнай») падэшвай,

хадзіць «шаркаючымі» крокамі,

даставаць рукі з кішэняў для раўнавагі,

у цёмны час сутак — абавязкова флікер,

абходзіць бліскучыя ўчасткі, металічныя крышкі люкаў і нахільныя паверхні.

Калі паслізнуліся на вуліцы, важна паспрабаваць прысесці, згрупавацца і перакуліцца, каб змякчыць удар. Але калі ў бліжэйшыя дні можна застацца дома, лепш так і зрабіць, дадалі ў ДАІ.