Суд у Баку прысудзіў да пажыццёвага зняволення былых кіраўнікоў Нагорнага Карабаха
- 5.02.2026, 15:07
Іх абвінавацілі ў злачынствах «супраць міру і чалавечнасці» паводле 20 крымінальных артыкулаў.
Бакинскі ваенны суд прысудзіў былога прэзідэнта непрызнанай Нагорна-Карабахскай Рэспублікі (НКР) Араіка Арутюняна да пажыццёвага зняволення, перадае Azertac.
Аналогічныя тэрміны атрымалі экс-міністр замежных спраў НКР Давід Бабаян, экс-спікер парламента Давід Ішханян, былы камандуючы Арміяй абароны Левон Мнацаканян і яго намеснік Давід Манукян. Яшчэ двум экс-прэзідэнтам НКР Аркадзю Гукасяну і Бако Саакяну прысудзілі па 20 гадоў пазбаўлення волі. Ім не змаглі прызначыць пажыццёвыя тэрміны з-за ўзросту — абодвум больш за 65 гадоў.
Усіх пералічаных затрымалі ў канцы 2023 года пасля ваеннай аперацыі Азербайджана ў Карабаху, у выніку якой рэгіён перайшоў пад кантроль Баку, а НКР была ліквідаваная. Лідараў непрызнанай рэспублікі абвінавацілі ў злачынствах «супраць міру і чалавечнасці» паводле 20 крымінальных артыкулаў, уключаючы вядзенне агрэсіўнай вайны, генацыд, тэрарызм і гвалтоўны захоп улады. Усяго на лаве падсудных апынуліся 16 чалавек, сярод якіх — былы прэм’ер НКР, мільярдэр Рубен Варданян, які адмовіўся ад расійскага грамадзя́нства. Яму таксама пагражае пажыццёвае зняволенне. Ні адзін з абвінавачаных не прызнаў віну.
Пасля ваеннай аперацыі Азербайджана ў Нагорным Карабаху 19 верасня 2023 года рэгіён пакінулі 100 тысяч армян, што там жылі. НКР, якая існавала з 1991 года, афіцыйна самараспусцілася 1 студзеня 2024 года. Са свайго боку прэм’ер Арменіі Нікол Пашынян падпісаў дэкларацыю аб прызнанні тэрыторыі Азербайджана ў 86,6 тысячы км², уключаючы Нагорны Карабах.
Пры гэтым Еўрапейскі парламент прыняў рэзалюцыю, у якой прыраўнаў насільнае перамяшчэнне армянскага насельніцтва Карабаха да этнічнай чысткі. У іншай рэзалюцыі ад сакавіка 2025 года армяне, якіх утрымліваюць у Баку, названыя закладнікамі, а суды над імі — фікцыяй.