Наймацнейшы выбух: вагоны з бензінам сышлі з рэек у Тамбоўскай вобласці РФ

• 4.02.2026, 17:40

Відаць велізарны слуп густога чорнага дыму, які падымаецца ў неба.

У Тамбоўскай вобласці Расіі сышлі з рэек грузавыя вагоны з бензінам. Пра здарэнне 4 лютага паведамілі ў прэс-службе кампаніі «Расійскія чыгункі».

Інцыдэнт адбыўся а 15:34 па мінскім часе на станцыі «Кочетовка-2» у Тамбоўскай вобласці. Пасля сходу з рэек вагонаў з палівам пачаўся моцны пажар. Інфармацыю пацвердзілі ў МЧС.

На кадрах відэазапісаў, выкладзеных у сацсетках, відаць велізарны слуп густога чорнага дыму, які падымаецца ў неба. Мясцовыя жыхары сцвярджаюць, што пасля аварыі адбыўся выбух.

Для ліквідацыі наступстваў здарэння ў РЖД створаны аператыўны штаб. На месца накіраваныя пажарныя і аднаўленчыя цягнікі.

Рух цягнікоў праз станцыю прыпынены. Чакаецца затрымка цягнікоў паўднёвага напрамку.