Прадстаўлены першы ў свеце біяміметычны ШІ-робат

• 4.02.2026, 14:00

Ён максімальна набліжаны да чалавека паводле знешнасці і паводзінаў.

У Шанхаі кампанія DroidUp прадставіла робата Moya, якога распрацоўшчыкі пазіцыянуюць як першага ў свеце «поўнасцю біяміметычнага ўвасобленага інтэлектуальнага робата». Відэа з дэманстрацыяй яго магчымасцяў хутка разышліся па кітайскіх сацсетках, выклікаўшы бурнае абмеркаванне дзякуючы надзвычай рэалістычнаму знешняму выгляду і паводзінам машыны.

Moya належыць да класа ўвасобленага штучнага інтэлекту – сістэм, якія здольныя не толькі апрацоўваць інфармацыю, але і ўспрымаць навакольнае асяроддзе і ўзаемадзейнічаць з ім у фізічнай прасторы. Паводле слоў стваральнікаў, робат умее ўзнаўляць мікравыразы твару, утрымліваць зрокавы кантакт і дэманстраваць тонкія мімічныя рэакцыі, што набліжае яго паводзіны да чалавечых.

Вышыня робата складае 1,65 метра, вага — каля 32 кілаграмаў. Яго прапорцыі максімальна набліжаныя да целаскладу дарослага чалавека. DroidUp сцвярджае, што Moya падтрымлівае тэмпературу «цела» ў дыяпазоне 32–36 °C, узмацняючы эфект жывой прысутнасці падчас зносін. Дакладнасць імітацыі чалавечай хадзьбы, паводле дадзеных кампаніі, дасягае 92%.

У той жа час знешні выгляд і рухі робата выклікалі неадназначную рэакцыю карыстальнікаў. Частка гледачоў была ўражаная рэалістычнасцю Moya, іншыя адзначылі трывожныя адчуванні, уласцівыя эфекту «злавеснай даліны», калі штучны аб’ект выглядае амаль як чалавек, але не цалкам.

Колькі каштуе? стартавая цана на Moya — $173 тысячы.

Кампанія раскрывае няшмат тэхнічных падрабязнасцяў, аднак адзначае, што распрацоўка грунтуецца на папярэдніх праектах DroidUp у галіне гуманападобнай робататэхнікі. Moya не разглядаецца выключна як хатні робат: яго патэнцыйнае прымяненне звязана з аховай здароўя, адукацыяй і іншымі сферамі, дзе важнае цеснае ўзаемадзеянне чалавека і машыны. Выхад робата на рынак чакаецца да канца 2026 года.