СМІ: Расія перахапіла шэраг ключавых еўрапейскіх спадарожнікаў

• 4.02.2026, 13:07

Якія дадзеныя мог атрымаць Крэмль?

Расійскія касмічныя апараты маглі перахапіць сувязь не менш як дзесяці ключавых спадарожнікаў еўрапейскіх краін, што ставіць пад пагрозу канфідэнцыйную інфармацыю дзяржаў кантынента.

Пра гэта паведамляе Financial Times.

Паводле звестак выдання, прадстаўнікі еўрапейскіх службаў бяспекі лічаць, што два расійскія касмічныя апараты змаглі перахапіць шэраг спадарожнікаў. Гэта можа прывесці да збояў у працы або нават да іх падзення.

Акрамя таго, пад пагрозай апынулася канфідэнцыйная інфармацыя, якую перадавалі гэтыя спадарожнікі, у прыватнасці сакрэтныя ўрадавыя і некаторыя ваенныя паведамленні.

На працягу некалькіх гадоў ваенныя і цывільныя касмічныя ведамствы Еўропы сачылі за дзейнасцю «Луч-1» і «Луч-2» — двух расійскіх аб'ектаў, якія неаднаразова здзяйснялі падазроныя манеўры на арбіце.

З моманту запуску ў 2023 годзе «Луч-2» наблізіўся да 17 еўрапейскіх спадарожнікаў.

Разведвальныя дадзеныя, сабраныя Расіяй у космасе, могуць дапамагчы Маскве каардынаваць гібрыдныя атакі на еўрапейскія краіны, у прыватнасці для хакерскіх аперацый.