У Расіі рэзка вырасла захворвальнасць на сіфіліс
- 4.02.2026, 12:39
Асабліва сярод мужчын старэй за 40 гадоў.
У Расіі за апошнія чатыры гады рэзка вырасла захворвальнасць на сіфіліс, сведчаць даныя са зборніка Росстата «Ахова здароўя ў Расіі», на якія спасылаецца «Коммерсант».
Калі ў 2020 годзе, паводле ацэнкі ведамства, было зафіксавана 15,3 тыс. выпадкаў захворвання, то ў 2024-м (больш свежых даных пакуль няма) — ужо 25,1 тыс. Такім чынам, рост склаў 64,05%. Пры гэтым пік па колькасці выяўленых пацыентаў з сіфілісам прыйшоўся на 2022 год, калі ў Расіі зарэгістравалі 27,8 тыс. выпадкаў захворвання. Да 2020 года захворвальнасць скарачалася — з 34,4 тыс. выпадкаў у 2015-м. Паводле статыстыкі, сіфіліс найчасцей сустракаецца ў мужчын ва ўзросце ад 40 гадоў. У гэтай катэгорыі захворвальнасць падскочыла больш чым удвая — з 4,7 тыс. выпадкаў у 2020 годзе да 9,7 тыс. у 2024-м.
У профільным ГНЦ дэрматавенералогіі і касметалогіі Мінздароўя РФ удакладняюць, што за мінулы год колькасць выпадкаў сіфілісу ў параўнанні з 2024-м скарацілася на 16%. Абсалютныя лічбы там не прывялі. Агульны рост захворвальнасці на сіфіліс можа быць звязаны з тым, што многія пацыенты займаюцца самалячэннем або звяртаюцца ў некваліфікаваныя прыватныя клінікі і «часта не далечваюцца». «Таму мы бачым вяртанне другасных формаў — гэта падтрымлівае эпідэмічны працэс», — патлумачыў Вадзім Пакроўскі, кіраўнік спецыялізаванага навукова-даследчага падраздзялення па прафілактыцы і барацьбе са СНІДам ФГБУ «Навукова-даследчы інстытут эпідэміялогіі» Роспотребнадзора.
Спецыяліст таксама звязвае рост колькасці хворых з узмацненнем патрабаванняў да ўліку захворвальнасці, што само па сабе можа прыводзіць да росту паказчыка. «У канцы дзесятых — пачатку дваццатых гадоў многія камерцыйныя клінікі, якія не ўваходзяць у сістэму Мінздароўя або Роспотребнадзора, проста не паведамлялі пра выяўленыя выпадкі ІППШ (інфекцый, што перадаюцца палавым шляхам). Гэта моцна скажала афіцыйную карціну», — адзначыў ён.
У той жа час, паводле справаздачы Росстата, захворвальнасць іншымі класічнымі ІППШ у Расіі скарачаецца з 2015 года. Так, колькасць выпадкаў трыхаманіязу за гэты час зменшылася на 69% — з 92,1 тыс. да 28,8 тыс. Ганарэю выяўлялі на 64% радзей — 9,7 тыс. выпадкаў у 2024-м супраць 27,1 тыс. у 2015-м. Захворвальнасць хламідійнымі інфекцыямі скарацілася на 58% (з 60,5 тыс. да 25,6 тыс.). Колькасць афіцыйна зарэгістраваных новых выпадкаў ВІЧ змяншылася са 100,2 тыс. да 48,4 тыс., вынікае з даных ведамства.