Былога мужа Джыл Байдэн абвінавацілі ў забойстве жонкі

• 4.02.2026, 11:00

У постпрэзідэнцкім офісе Джо Байдэна адмовіліся каментаваць арышт і абвінавачанні.

Былому мужу былой першай лэдзі ЗША Джыл Байдэн, 77-гадоваму Уільяму Сцівэнсану, прад’явілі абвінавачанне ў забойстве першай ступені па справе аб смерці яго цяперашняй жонкі Лінды Сцівэнсан. Пра гэта паведамляе CNN.

Паводле даных паліцыі, Лінду Сцівэнсан, якой было 64 гады, знайшлі без прытомнасці 28 снежня ў доме падружжа ў акрузе Нью-Касл пасля выкліку, звязанага з бытавой сваркай. Жанчыну выявілі мёртвай, аднак праваахоўнікі не раскрылі падрабязнасцяў пра прычыну і абставіны яе смерці.

Уільяма Сцівэнсана арыштавалі і змясцілі ў выпраўленчую ўстанову Говарда Янга. Яго трымаюць пад вартай пасля таго, як ён не здолеў унесці заклад у памеры 500 тысяч долараў. Пакуль невядома, ці ёсць у яго адвакат.

Шлюб Джыл і Уільяма

Сцівэнсан быў жанаты з Джыл Байдэн з 1970 па 1975 год. У сваіх мемуарах 2019 года Байдэн называла гэты шлюб «памылкай маладосці», хоць адзначала, што ў свой час верыла ў іх адносіны. У постпрэзідэнцкім офісе Джо Байдэна адмовіліся каментаваць арышт і абвінавачанні.

Згодна з некралогам, Лінду Сцівэнсан апісваюць як чалавека, глыбока адданага сям’і. Яна любіла праводзіць час з дачкой і ўнучкай, балела за каманду «Філадэльфія Іглз», а ў апошнія гады заснавала ўласны бухгалтарскі бізнес.

«Лінду будуць памятаць як настойлівага, добрасардэчнага і адданага чалавека», — гаворыцца ў паведамленні пра яе смерць.