Навукоўцы распрацавалі капялюш супраць аблысення

• 4.02.2026, 10:32

Лабараторныя выпрабаванні далі ўражлівы вынік.

Навукоўцы з Паўднёвай Карэі і Кітая распрацавалі капялюш з арганічнымі інфрачырвонымі святлодыёдамі, які можа стаць бяспечнай і зручнай альтэрнатывай традыцыйным прэпаратам ад аблысення, піша RTVI.us.

Традыцыйныя метады лячэння алапецыі (аблысення) ўключаюць лекі і святлавую тэрапію. Прылады для лазернай тэрапіі звычайна ўяўляюць сабой цяжкую канструкцыю ў выглядзе шлема, яны прызначаныя галоўным чынам для выкарыстання дома. Акрамя таго, яны ўздзейнічаюць кропкава, не ахопліваючы ўсю паверхню галавы.

У новай распрацоўцы выкарыстаныя арганічныя святлодыёды (OLED). Іх перавага ў тым, што яны складаюцца з тонкага слоя вугляроднага матэрыялу і раўнамерна выпраменьваюць святло на значнай адлегласці. Святлодыёды ўбудаваныя ў мяккі матэрыял, падобны да тканіны, які паўтарае натуральныя контуры галавы і забяспечвае святлавое ўздзеянне па ўсёй паверхні скуры галавы.

Каманда засяродзіла намаганні на запаволенні старэння клетак валасовых фалікулаў. Выкарыстоўваючы тэхналогіі кіравання даўжынёй хвалі, першапачаткова распрацаваныя для дысплеяў, даследчыкі наладзілі OLED так, каб святлодыёды выпраменьвалі інфрачырвонае святло ў дыяпазоне 730−740 нанаметраў — аптымальная даўжыня хвалі для актывацыі клетак дэрмы, якія адказваюць за рост і рэгенерацыю валасоў.

«Галоўнае дасягненне — доказ таго, што святло з дакладна падабранай даўжынёй хвалі можа эфектыўна запавольваць старэнне клетак валасовых фалікулаў», — расказаў адзін з аўтараў даследавання, доктар Чо Ын Хэ.

Лабараторныя выпрабаванні паказалі, што старэнне валасовых фалікулаў запаволілася прыкладна на 92% у параўнанні з кантрольнай групай, дзе ўжываліся звычайныя метады святлавой тэрапіі.

Вынікі даследавання пакуль не апублікаваныя, распрацоўка знаходзіцца на стадыі даклінічных выпрабаванняў.