Зубры аблюбавалі поле проста пад вокнамі дамоў у аграгарадку на Гомельшчыне

• 3.02.2026, 23:29

Фотафакт.

Статак зуброў наблізіўся да дамоў аграгарадка Азераны Жыткавіцкага раёна, паведаміла прэс-служба Гомельскага аблвыканкама.

Жывёлы пацягнуліся да жылля людзей таму, што тут работнікі нацпарку традыцыйна ўладкоўваюць падкормкавую пляцоўку, распавёў намеснік генеральнага дырэктара па навукова-даследчай рабоце Нацыянальнага парку «Прыпяцкі» Андрэй Бяспалы.

Такія «сталовыя» дапамагаюць захаваць лікасць і зводзіць да мінімуму магчымую шкоду сельгасугоддзям.

«У зімовы галодна-халодны перыяд, асабліва калі з-пад глыбокага снегу, як сёлета, здабыць натуральны корм становіцца складана, дарослая вопытная самка прымае рашэнне вывесці статак з лесу. У кармушках — авёс і плюшчаная кукуруза, сена, морква, а таксама соль», — распавялі ў Гомельскім аблвыканкаме.