Белы дом паведаміў пра рэакцыю Трампа на начны ўдар РФ па Украіне

• 3.02.2026, 23:15

Прэзідэнт ЗША раней асабіста прасіў Пуціна не наносіць удараў па Украіне з-за моцных маразоў.

Прэзідэнта ЗША Дональда Трампа не здзівіў начны расійскі ўдар па Украіне, паведаміла журналістам прэс-сакратарка Белага дома Кэролайн Левіт.

Адказваючы на пытанне пра рэакцыю рэспубліканца, Левіт расказала, што размаўляла з Трампам раніцай 3 лютага, і той, «на жаль, не быў здзіўлены».

«Гэта дзве краіны, якія ўжо некалькі гадоў вядуць надзвычай жорсткую вайну», — сказала яна, дадаўшы, што канфлікт не пачаўся б, калі б Трамп быў пры ўладзе. Левіт абвінаваціла папярэдняга амерыканскага лідара Джо Байдэна ў «слабасці і некампетэнтнасці».

Трамп 29 студзеня заявіў, што асабіста прасіў расійскага дыктатара Уладзіміра Пуціна спыніць удары па Украіне на тыдзень з-за моцных маразоў. Калі менавіта гэта адбылося, ён не ўдакладніў.