У ААН ацанілі, колькі ўкраінскіх бежанцаў вернуцца дадому
- 3.02.2026, 18:46
Больш за ўсё ўкраінцаў вернецца з поўдня і ўсходу Еўропы.
Каля 4,3 мільёна ўкраінцаў атрымалі часовы прытулак за мяжой падчас вайны. Пасля завяршэння вайны на радзіму вернуцца ад 3 да 3,5 млн украінцаў. Пра гэта на брыфінгу для замежных дыпламатаў «Прагназаванне вяртання бежанцаў і разуменне наступстваў для аднаўлення Украіны: пачатковыя вынікі агент-арыентаванага прататыпа» заявіла прадстаўніца УВКБ ААН ва Украіне Бернадэт Кастэль-Холінгсворт. Пра гэта піша УНІАН.
Яна прадставіла прагнастычную мадэль, распрацаваную УВКБ ААН, адносна вяртання бежанцаў ва Украіну ў выпадку завяршэння вайны. У прыватнасці, хто і куды вернецца, а таксама якія ўмовы будуць патрэбныя гэтым людзям.
Кастэль-Холінгсворт лічыць, што працяг вайны прыводзіць да таго, што ўсё менш людзей захочуць вярнуцца. Гэта датычыцца і бежанцаў, і перасяленцаў.
«Чым даўжэй вы пражываеце ў краіне, якая вас прытуліла, тым меншая верагоднасць вашага вяртання. У ліпені 2024 года хацелі вярнуцца 61% бежанцаў. У снежні 2025 года — 49%. Сярод унутрана перамешчаных асоб гэтыя лічбы складаюць адпаведна 73 і 35%», — сказала прадстаўніца УВКБ ААН.
Яна таксама нагадала, што каля 4,3 мільёна ўкраінцаў атрымалі часовы прытулак за мяжой падчас вайны.
«Мадэль паказвае, што дадому вернуцца 3–3,5 мільёна пасля завяршэння вайны», — падкрэсліла яна.
Акрамя таго, паводле прагнозаў ААН, больш украінцаў вернецца з поўдня і ўсходу Еўропы, менш — з поўначы кантынента.
«Ёсць розніца паміж бежанцамі ў Цэнтральнай і Усходняй Еўропе і ў Паўночнай Еўропе. З поўдня і ўсходу Еўропы імкнуцца вярнуцца больш бежанцаў, чым з Паўночнай Еўропы», — гаворыцца ў паведамленні.
Людзі хутчэй вернуцца, калі будзе куды і да каго. З дзецьмі вернуцца хутчэй. Важна памятаць, што вяртанне будзе вызначацца наяўнасцю працоўнага месца, жылля, медыцынскай дапамогі.
Таксама чыноўніца УВКБ ААН адзначыла, што далёка не заўсёды людзі будуць вяртацца ў родныя дамы, бо хтосьці страціў свой дом, у кагосьці ён застаўся ў акупацыі. Паводле прагнозаў ААН, значная колькасць вернецца ў буйныя гарады, дзе ўжо пражываюць часова перамешчаныя асобы, і гэта дадасць праблем уладам гэтых гарадоў, бо навапрыбылых трэба будзе размясціць, забяспечыць працай, сацыяльнай і медыцынскай дапамогай.
У той жа час у ААН прагназуюць, што калі настане мір з уступкамі з боку Украіны, вялікая колькасць бежанцаў не захоча вяртацца.
Мадэляванне таксама паказвае, што з большай верагоднасцю будуць вяртацца пажылыя, адзінокія людзі і маці-адзіночкі з дзецьмі.
На прыняцце рашэння аб вяртанні таксама будзе ўплываць даступнасць жылля ва Украіне, наяўнасць працы, кампенсацыя за страчанае жыллё, доступ да адміністрацыйных паслуг, медыцыны.