«Гэта была паўза для назапашвання ракет»

• 3.02.2026, 15:04

Генерал-маёр СБУ патлумачыў, навошта Пуціну спатрэбілася «энергетычнае перамір’е»

Начныя ўдары РФ па цеплаэнергетыцы Украіны прыйшліся на самыя моцныя маразы і пакінулі без ацяплення сотні тысяч людзей. Пры гэтым у Крамлі раней казалі пра «энергетычнае перамір’е», якое, мяркуючы з усяго, існавала толькі на словах.

Ці было ўвогуле «энергетычнае перамір’е», пра якое казаў Пуцін? Пра гэта сайт Charter97.org пагаварыў з генерал-маёрам СБУ ў адстаўцы Вікторам Ягунам:

— Думаю, што гэта была паўза для назапашвання Пуціным дронаў і ракет. Па-другое, гэта была чарговая дэманстрацыя Крамлём таго, што мы ідзём на саступку асабіста Трампу, але робім усё такім чынам, каб гэта асабістая саступка не была выкананая. Гэта ж такая тактыка: нас Трамп папрасіў — мы зрабілі, але зрабілі так, што ўрэшце яшчэ і горш стала.

Што называецца «энергетычным перамір’ем», калі б’юць па энергетычнай лагістыцы? Гэта значыць, напрыклад, акупанты не б’юць па электрастанцыях, але б’юць па шахцёрах, якія здабываюць паліва. Не б’юць па электрастанцыях, але б’юць па транспарце, які дастаўляе гэта паліва на электрастанцыі.

Ці прымаецца нейкае рашэнне і яго прытрымліваюцца, ці гэта ўсё проста сказана — нават не для знешняй аўдыторыі, а для ўнутранага карыстання.

— Як Украіна павінна адказаць на гэты ўдар РФ?

— Крэмль разумее, што Украіна працягне тое, што мы працягвалі. Украіна не б’е па тых энергетычных аб’ектах, якія выкарыстоўваюцца выключна для грамадзянскіх патрэб. Мы б’ем па тых аб’ектах, якія працуюць на вайсковую эканоміку РФ.

Так, паблізу гэтых аб’ектаў ёсць і дамы, і школы, і дзіцячыя сады. Але людзі ў РФ павінны разумець, што мы знішчаем вайсковую інфраструктуру і эканоміку, якая працуе на вайну і агрэсію. Удары па вайсковай інфраструктуры і будуць якраз тым самым адназначным адказам агрэсару.