ШІ ужо бярэцца нават за напісанне валянцінак

• 3.02.2026, 14:46

Аднак спецыялісты заклікаюць гэтага пазбягаць.

На тле набліжэння Дня святога Валянціна даследчыкі папярэджваюць, што даручаючы ChatGPT напісаць рамантычнае пасланне, людзі рызыкуюць адчуць сябе горш, піша The Conversation (пераклад — сайт Charter97.org).

Навукоўцы, якія вывучаюць уплыў тэхналогій на паводзіны спажыўцоў, правялі серыю эксперыментаў і высветлілі: калі чалавек адпраўляе дарагому чалавеку паведамленне, цалкам створанае ШІ, ён адчувае віну. Прычына — адчуванне нешчырасці.

Паводле даследчыкаў, узнікае «несупадзенне крыніцы і аўтарства», атрымальніку здаецца, што паведамленне напісаў адпраўнік, хоць насамрэч яго стварыла нейрасетка. Гэта нагадвае схаваных сааўтараў — ад піяршчыкаў зорак да палітычных спічрайтараў.

Цікава, што пры выкарыстанні купленых паштовак людзі віны не адчувалі. Усе разумеюць, што тэкст у паштоўцы — не асабістая творчасць. А калі паведамленне таемна складае сябар, узровень віны аказваецца такі ж высокі, як і пры дапамозе ШІ.

Эфект аслабляецца толькі ў двух сітуацыях: калі паведамленне так і не адпраўляюць або калі адрасат — не блізкі чалавек.

Даследчыкі раяць выкарыстоўваць ШІ як памочніка, а не як паўнавартаснага аўтара. Нейрасетка можа прапанаваць ідэі, але канчатковы тэкст павінен быць напісаны асабіста і дапоўнены дэталямі, якія вядомыя толькі вам.

У адносінах, дзе важная шчырасць, цалкам аўтаматызаваныя прызнанні могуць пакінуць непрыемны асадак — як у адрасата, так і ў адпраўніка.