ЕС створыць платформу для абмену ваеннымі дадзенымі без удзелу ЗША

• 3.02.2026, 13:39

Да 2030 года.

Еўрапейскі саюз плануе да 2030 года стварыць уласную платформу для абмену ваеннымі дадзенымі без удзелу Злучаных Штатаў.

Пра гэта піша «Еўрапейская праўда» са спасылкай на Euractiv.

Выданне азнаёмілася з прэзентацыяй Еўрапейскага абароннага агенцтва, паводле якой інстытуты ЕС працуюць над новай платформай пад назвай «Еўрапейская абаронная прастора дадзеных штучнага інтэлекту» (DAIDS).

Мэта праекта — даць краінам Еўрасаюза магчымасць бяспечнага абмену канфідэнцыйнай інфармацыяй, звязанай з абаронай.

Да цяперашняга часу дзяржавы — чальцы ЕС выбіралі пастаўшчыкоў інфармацыйных рашэнняў на падставе нацыянальных пераваг, што прывяло да фармавання разрозненай і неўзгодненай сістэмы правайдэраў для захоўвання і перадачы адчувальных дадзеных.

У мінулым годзе Еўрапейская камісія прапанавала стварыць «надзейнае, бяспечнае і сумяшчальнае асяроддзе дадзеных» у сваёй абароннай «дарожнай карце» да 2030 года. Чакаецца, што новая платформа будзе цалкам гатовая да гэтага тэрміну.

ЕС ужо заключыў кантракты з кампаніямі, якія возьмуцца за распрацоўку праекта. Наступным этапам стане стымуляванне краін-членаў да каардынацыі сумесных закупак тэхналогій, што адпавядаюць будучай еўрапейскай прасторы дадзеных.

У дакументах таксама пазначана, што ў 2029–2030 гадах плануецца ўкараненне DAIDS у паўсядзённую дзейнасць узброеных сіл і абаронных структур дзяржаў Еўрасаюза.

Як адзначае Euractiv, Еўрапейскі саюз усё часцей ставіць пад сумнеў сваю залежнасць ад Злучаных Штатаў. У сувязі з гэтым для еўрапейскіх армій крытычна важна забяспечыць належную абарону дадзеных. Цяпер многія краіны захоўваюць і абменьваюцца абароннай інфармацыяй, выкарыстоўваючы інфраструктуру замежнай, найчасцей амерыканскай, вытворчасці, што стварае патэнцыйныя ўразлівасці.