Індыйцы просяць свае ўлады выратаваць іх з Беларусі

• 3.02.2026, 8:23

Іх падманам адправілі ў нашу краіну.

Члены сем'яў чатырох грамадзян Індыі, якія ўжо амаль два месяцы знаходзяцца ў цяжкім становішчы ў Беларусі, у панядзелак, 2 лютага, падалі петыцыі ў адміністрацыю акругі Каньякумары з просьбай аб іх выратаванні, піша The Hindu.

Чатыры мужчыны накіраваліся ў нашу краіну ў пошуках працы праз рэкрутынгавае агенцтва. Згодна з петыцыяй, пададзенай Анітай з Віжунтхаямбалама, яе муж Т. Тхангасвамі выехаў у Беларусь у снежні 2025 года пасля таго, як прыватнае агенцтва з Каімбатура запэўніла яго ў прадастаўленні працы.

Аднак, нават праз амаль два месяцы пасля прыбыцця яе мужа ў Беларусь, яму не прадаставілі ні працу, ні належнае жыллё, ні харчаванне, адзначаецца ў петыцыі. У сувязі з гэтым яна звярнулася да ўладаў з просьбай неадкладна прыняць меры па яго выратаванні і вярнуць грошы, заплачаныя агенцтву.

Калі карэспандэнт The Hindu звязаўся з Тхангасвамі, той паведаміў, што агенцтва спачатку абяцала працаўладкаванне ў Ізраілі. Аднак пасля атрымання грошай агенцтва перастала выходзіць на сувязь. «Нават пасля таго, як мы каля года спрабавалі з імі звязацца, нас у выніку адправілі на некваліфікаваную працу ў Беларусь», — сказаў ён.

Ён дадаў, што ён і яшчэ трое чалавек з акругі Каньякумары, а таксама пяцёра з іншых акругаў Таміл-Наду, усе нанятыя праз тое ж агенцтва, апынуліся ў цяжкім становішчы ў Беларусі. Сярод іх — М. Вібін Радж (41 год) з Веркіламбі, Дж. Пол Надар (52 гады) з Тхолічала і П. Хосэ (44 гады) з Пункараі — усе з акругі Каньякумары.

Разам з імі ў Беларусі таксама апынуліся П. Марымутху (40 гадоў) з акругі Віллупурам, Н. Перумал (37 гадоў) і Эсваран (47 гадоў) з акругі Вірудхунагар, С. Арул з акругі Тырупатур і Р. Рамеш (42 гады) з акругі Эродэ.

Тхангасвамі заявіў, што агенцтва не дае выразных адказаў на іх запыты, і ўсе дзевяць чалавек адчуваюць сур'ёзныя цяжкасці ў незнаёмай краіне на фоне моцных снегападаў. Ён звярнуўся да ўрада з просьбай прыняць меры і выратаваць іх з Беларусі.