Расію накрыла «цунамі» камунальных аварыяў

• 2.02.2026, 16:19

Святло, вада і ацяпленне адключаліся тысячы разоў.

З Новага года ў Расіі рэзка падскочыла колькасць камунальных аварыяў. Паведамленні пра адключэнні электраэнергіі паступалі 723 разы, ацяплення — 552 разы, вады — 513 разоў, падлічыла «Новая газета Еўропа». Усяго публічна паведамлялася пра 1778 выпадкаў. Для параўнання: у студзені 2025-га іх было 983. Лідарамі па адключэннях электраэнергіі сталі Краснадарскі край і Мурманская вобласць. У першым рэгіёне адна з буйных аварыяў адбылася ў Беларэчанску. Паводле паведамленняў уладаў, з-за моцнага снегападу ў Новы год без святла засталіся больш як 84 тысячы абанентаў. Адна з жыхарак распавяла, што блэкаўт не маглі ліквідаваць тыдзень.

У Мурманскай вобласці рэгіянальная сталіца і суседні Севераморск — месца размяшчэння галоўнай базы Паўночнага флоту Расіі — 23 студзеня засталіся без святла з-за абрушэння пяці апор лініі электраперадачы, чатырым з якіх было больш за 40 гадоў. Пасля аварыйных работ электраэнергію паўторна адключылі 31 студзеня.

Акрамя двух вышэйназваных рэгіёнаў, святло таксама часта знікала ў Белгародскай вобласці. Сітуацыю ўскладнялі абстрэлы. Так, самае маштабнае адключэнне адбылося 9 студзеня: тады Узброеныя сілы Украіны ўдарылі па двух ЦЭЦ і падстанцыі «Сторожевая», пакінуўшы без энергазабеспячэння 556 тысяч чалавек.

Сярод лідэраў па перабоях з вадой з-за аварыяў апынуўся Дагестан. У Каспійску яна не паступала ў некалькі шматкватэрных дамоў з 2 па 19 студзеня. У сацсетках на аналагічную праблему скардзіліся жыхары і іншых буйных населеных пунктаў рэгіёна. «У цэнтральных гарадах рэспублікі няма вады, часам выключаюць ацяпленне, выключаюць газ, святло. Своечасова не вывозіцца смецце, дарогі ў жахлівым стане», — гаварылася ў адным з пастоў.

Масавыя праблемы з ацяпленнем у студзені былі зафіксаваныя ў Забайкальскім краі. Жыхары пасёлка Атаманаўка Чыцінскага раёна, гэтак жа як і краснадарцы, сустрэлі Новы год у халодных кватэрах з-за аварыі на цеплатрасе. Пацярпелі каля 3 тысяч чалавек, іх не маглі падключыць цягам тыдня. 21 студзеня магістральную цеплатрасу прарвала ў пасёлку Дарасун Карымскага раёна.

Сярод лідараў па адключэннях ацяплення апынулася і Валгаградская вобласць: жыхары скардзіліся, што з-за аварыі на газаправодзе тэмпература ў кватэрах апусцілася да 11 градусаў, а на вокнах утварыўся лёд. «Гэта ўжо не пра „камунальныя нязручнасці“, а пра прамую пагрозу здароўю дзяцей. Калі дом развальваецца, трубы гнілыя з моманту пабудовы, а кіруючая кампанія проста «знікае», — гэта правал усёй сістэмы ЖКГ і кантролю», — пісала адна з жыхарак.

Паводле даных міністра будаўніцтва і ЖКГ Ірэка Файзулліна, знос камунальных сетак у рэгіёнах вагаецца ад 40 да 80%, што прыводзіць да частых аварый. Пры гэтым, згодна з планамі, да 2028 года выдаткі на ЖКГ знізяцца на 2% у параўнанні з 2025 годам.

Адначасова з гэтым расіян чакае павышэнне тарыфаў ЖКГ. Першая індэксацыя адбылася 1 студзеня, а другая запланаваная на кастрычнік, пасля выбараў у Дзярждуму. Сумарны рост у шэрагу рэгіёнаў можа перавысіць 20%.