Зяленскі: Вяртанне ўкраінскіх мужчын з-за мяжы дапамагло б арміі

• 1.02.2026, 10:56

Гэтае пытанне прэзідэнт Украіны ўжо абмяркоўваў з адным з еўрапейскіх лідараў.

Прэзідэнт Украіны Уладзімір Зяленскі лічыць, што вяртанне з-за мяжы ўкраінцаў прызыўнога ўзросту ва Украіну дапамагло б арміі.

Пра гэта ён сказаў у інтэрв’ю «Чэшскаму радыё».

«На маю думку, вельмі хацелася б дапамагчы тым вайскоўцам, якія на фронце, у якіх з-за таго, што часам не стае хлопцаў, няма ротацыі. І гэта было б вельмі справядліва. Каб вайскоўцы мелі адпачынак, каб мелі магчымасць убачыць родных, блізкіх, проста адпачыць. Ведаеце, як вяртацца ў абдымкі сваёй сям’і, што вельмі важна, гэта дае табе энергію», — сказаў кіраўнік дзяржавы.

Зяленскі лічыць, што ў Чэхіі ёсць маладыя ўкраінцы, якія маглі б быць ва Украіне і дапамагаць арміі.

«Я думаю, гэта важна, і наша ўнутраная камунікацыя можа не дайсці туды (у Чэхію. — Рэд.). Вельмі важна, каб усе гэтага хацелі», — сказаў прэзідэнт Украіны.

Таксама Зяленскі распавёў, што з пытаннем пра ўкраінскіх мужчын за мяжой да яго звяртаўся адзін з еўрапейскіх лідараў. Ён прасіў Зяленскага запрашаць украінцаў вяртацца дадому.

«І я яму сказаў, што магу запрашаць іх ва Украіну. Я магу гэта зрабіць. Але як гэта спрацуе? Калі чалавек уцёк ад вайны... Былі розныя людзі. Былі тыя, хто ўцёк ад вайны, а потым вярнуўся і стаў абараняць дзяржаву. А некаторыя вывозілі свае сем’і, а потым вярнуліся на фронт... То-бок ёсць розныя выпадкі. Але, безумоўна, чым больш нашых маладых людзей, якія з’ехалі за мяжу, якія фізічна здольныя і мабілізацыйнага ўзросту, вярнуліся б сюды, тым лягчэй было б нашай арміі, нашым людзям і Украіне», — дадаў прэзідэнт Украіны.