«Надвор’е лютае»: Усік запісаў папярэджанне ўкраінцам

• 9.01.2026, 22:35

Зварот прагучаў пасля ракетна-дроннай атакі РФ.

Трохразовы абсалютны чэмпіён свету ў двух вагавых катэгорыях Аляксандр Усік заклікаў украінцаў быць уважлівымі на дарогах. З-за непагадзі і масіраванай ракетна-дроннай атакі Расіі ў ноч на 9 студзеня баксёр звярнуўся да суайчыннікаў, не згадаўшы сам удар агрэсараў па Кіеве і Львове.

Адпаведнае відэа Усік, надзеўшы балаклаву, апублікаваў на сваёй старонцы ў сацыяльнай сетцы Instagram. 38-гадовы ўраджэнец часова акупаванага Сімферопаля таксама зрабіў асаблівы акцэнт на тым, што ў гэты складаны момант украінцы павінны з павагай ставіцца адзін да аднаго і дапамагаць адзін аднаму.

«Паважаныя сябры, усім добрага дня. Надвор’е лютае. На дарозе галалёд. Будзьце ўважлівыя, калі ласка. Захоўвайце правілы дарожнага руху і паважайце адзін аднаго. Не нервавайцеся, максімальна спакойна. Усім дабра», – сказаў Усік.