Лукашэнка змяніў камандуючага Сіламі спецыяльных аперацый

• 9.01.2026, 19:38

Дыктатар прызначыў сілавіка, датычнага да разгонаў пратэстаў.

Дыктатар Лукашэнка прызначыў палкоўніка Аляксандра Ільюкевіча камандуючым Сіламі спецыяльных аперацый Узброеных Сіл Беларусі.

Генерал-маёр Вадзім Дзянісенка, які займаў гэтую пасаду, звольнены з вайсковай службы ў запас па ўзросце. Адпаведныя ўказы дыктатар Аляксандр Лукашэнка падпісаў 9 студзеня.

Да прызначэння Аляксандр Ільюкевіч займаў пасаду першага намесніка камандуючага Сіламі спецыяльных аперацый Узброеных Сіл. А да таго быў камандзірам 38-й Брэсцкай асобнай гвардзейскай дэсантна-штурмавай брыгады.

У канцы 2020 года Лукашэнка ўручыў Ільюкевічу і іншым сілавікам дзяржаўныя ўзнагароды за разгоны акцый пратэсту пасля выбараў 9 жніўня.