У Грэнландыі адхілілі любыя фінансавыя прапановы Трампа

• 9.01.2026, 18:40

Востраў не прадаецца.

Дзве прадстаўніцы Грэнландыі ў парламенце Даніі заявілі, што ніякія грошы не прымусяць грэнландцаў пагадзіцца на далучэнне да ЗША, нягледзячы на магчымыя прапановы з боку прэзідэнта Дональда Трампа.

Пра гэта паведамляе Bloomberg.

З рэзкай пазіцыяй выступілі Аая Хемніц — прадстаўніца Грэнландыі ў датскім парламенце і кіраўніца камітэта па справах аўтаномнай тэрыторыі, а таксама Акі-Матыльда Хог-Дам — дэпутатка ад апазіцыйнай грэнландскай партыі Naleraq («Арыенцір»).

«Ніякая сума грошай не можа купіць нашу нацыянальную душу. Само дапушчэнне, што народ можна купіць, — абразлівае. Якая карысць ад аднаразовай выплаты, калі пры гэтым разбураецца ўсё, на чым трымаецца грамадства?» — заявіла Хемніц.

Хог-Дам таксама катэгарычна адхіліла магчымасць любых фінансавых пагадненняў аб далучэнні да ЗША.

«Мы не тавар, якім можна гандляваць. Колькі б грошай ні прапаноўвалі, гэта ўсё адно будзе занадта танна. Гэта пытанне годнасці», — падкрэсліла яна.

Паводле слоў Хемніц, у выпадку ўсталявання амерыканскага кантролю культура, ідэнтычнасць, мова і традыцыйны лад жыцця Грэнландыі «будуць разбураныя ў надзвычай сціслыя тэрміны».