У Гомелі абмяркоўваюць магчымую прычыну выбуху газу ў доме

• 9.01.2026, 17:20

Улады засакрэцілі інфармацыю.

Праз тры тыдні пасля выбуху газу ў шматкватэрным доме па вуліцы Касарава, 3 у Гомелі, у выніку якога былі разбураны некалькі кватэр і як мінімум адзін чалавек загінуў, улады так і не назвалі прычыну інцыдэнту.

Пра тое, што прывяло да трагедыі, маўчаць і чыноўнікі, і адпаведныя ведамствы. На гэтым фоне сярод гамяльчан распаўсюджваецца інфармацыя пра меркаваную прычыну выбуху і пра тое, што яна засакрэчана, заўважыў «Флагшток».

Як сцвярджаюць некаторыя жыхары горада, тых, хто ведае пра прычыну, абавязалі даць падпіску аб неразгалошванні. А выбух нібыта здарыўся ў той момант, калі работнікі камунальных службаў варылі трубы.

Гэтую версію абмяркоўваюць у сацсетках і тлумачаць:

«Калі варылі трубы, то паху газу не было, бо пры зварцы/разанні выкарыстоўваюць кісларод. І эпіцэнтр быў не на кухні».

«Кісларод, ацэтылен выкарыстоўваюць пры газавай зварцы, а яны ў балёнах».

Акрамя таго, з’явілася сведчанне відавочцы здарэння з цікавай дэталлю. Жыхарка адной з кватэр, з якой пагаварылі «Сильные новости», знаходзілася ўдома ў момант выбуху. І калі яна выбегла з кватэры адразу пасля выбуху і спускалася па лесвіцы, сустрэла рабочага, які таксама выбягаў на вуліцу. Той сказаў ёй:

«Хутчэй на вуліцу, падлога правалілася з васьмога на сёмы».

Які менавіта гэта быў рабочы, відавочца не ўдакладніла. Але адзначыла, што выбух быў такой сілы, што яе гадавалае дзіця падкінула, а саму яе выкінула з канапы, тэлефон з рук выляцеў у калідор.

Падкрэслім, што гамяльчане дзеляцца ў сацсетках рознымі версіямі з-за маўчання ўладаў, якое выклікае падазрэнні. Карыстальнікі прыводзілі такія аргументы:

«Дзіўна, што маўчаць пра вінаватага ў уцечцы газу. Калі б вінаваты быў уласнік кватэры, у той жа дзень з кожнага праса пра гэта б казалі, а тут усё падазрона ціха».

«Такое адчуванне, што тут вінаватыя дзяржструктуры. Напрыклад, магчыма, змянялі лічыльнікі або яшчэ што… А як у нас прынята, калі вінаваты не людзі, а дзяржава — усё замоўчваецца».

Ускосным пацвярджэннем меркавання, што ў інцыдэнце вінаватыя дзяржструктуры, могуць служыць абяцанні ўладаў за кошт бюджэту пакрыць усе выдаткі. Таксама старшыня аблвыканкама Іван Крупко паставіў задачу «сабраць дом аж да аздаблення, вярнуўшы яму першапачатковы выгляд».