ЗША пачалі пераслед яшчэ чатырох танкераў пад расійскім сцягам у Атлантыцы
- 9.01.2026, 15:57
Судны пакінулі воды Венесуэлы і ўцякаюць у бок Афрыкі і Еўропы.
Танкеры ценявога флоту, якія ўцякаюць з Венесуэлы, актыўна спрабуюць схавацца ад ваенных караблёў ЗША, змяняючы сцяг на расійскі. Гэта, праўда, не дапамагло судну, што спрабавала ўкрыцца ў Мурманску: амерыканцы ў сераду ўзялі яго на абардож.
Эсмінец ВМС ЗША пераследуе чатыры нафтавыя танкеры, якія на пачатку гэтага тыдня пакінулі воды Венесуэлы і цяпер спяшаюцца сысці праз Атлантыку, накіроўваючыся ў бок Афрыкі і Еўропы, піша The New York Times са спасылкай на спадарожнікавыя здымкі і словы амерыканскага вайсковага чыноўніка. Гэтыя танкеры — частка групы з 16 суднаў, якія, відаць, зрабілі скаардынаваную спробу прарваць марскую блакаду Венесуэлы, адначасова выйшаўшы з яе партоў у розных напрамках, адзначае газета. ЗША пакуль змаглі спыніць толькі адзін з гэтых танкераў: у сераду ў Карыбскім моры амерыканскія вайскоўцы высадзіліся на борт M Sophia.
Адзін з танкераў, Veronica, што ідзе пусты, на гэтым тыдні змяніў назву на Galileo і сцяг — на расійскі, відавочна спрабуючы ўратавацца ад затрымання ВМС ЗША. Аналагічным чынам учынілі яшчэ тры танкеры, што перавозяць венесуэльскую нафту і знаходзяцца пад санкцыямі ЗША за транспарціроўку сыравіны з Расіі і Ірана, высветліла NYT паводле вынікаў аналізу Расійскага марскога рэгістра суднаходзтва: яны зарэгістраваліся ў Сочы або Таганрозе.
Адначасовы масавы выхад танкераў з Венесуэлы быў арганізаваны з разлікам на тое, што ў ЗША не хопіць законных паўнамоцтваў або сіл, каб спыніць іх усіх адразу, упэўнены Дэвід Танэнбаўм, які раней адказваў у Міністэрстве фінансаў ЗША за выкананне санкцый:
«Па сутнасці, гэта гонка зомбі, трэба проста быць хутчэй, чым карабель, што ідзе ўслед».
Змена сцяга на расійскі не дапамагла танкеру Bella 1. Спачатку ён змог перашкодзіць высадцы салдат Берагавой аховы ЗША, але пасля двух тыдняў пераследу яго ўсё ж такі ўзялі на абардож у водах паміж Ісландыяй і Шатландыяй. Ідучы праз Атлантычны акіян, танкер, што знаходзіцца пад санкцыямі ЗША, змяніў назву на Marinera, рэгістрацыю — на расійскую, а экіпаж нават намаляваў на яго борце расійскі сцяг. Масква накіравала яму насустрач падлодку і афіцыйна папрасіла ЗША спыніць пераслед. Аднак тыя, выкарыстоўваючы самалёты са сваіх еўрапейскіх авіябаз і пры падтрымцы брытанскага працілодкавага самалёта, затрымалі танкер.
Амерыканскія вайсковыя чыноўнікі сказалі NYT, што чакаюць новых затрыманняў падсанкцыйных суднаў.
Тым часам з-за блакады і дзеянняў ЗША аб'ём венесуэльскай нафты на танкерах у моры вырас з пачатку тыдня з 20 млн да больш як 29 млн барэляў, паведамляе Bloomberg са спасылкай на даныя Kpler. Гэта найвышэйшы ўзровень больш як за тры гады.
У асноўным танкеры з венесуэльскай нафтай скупчваюцца ў азіяцкіх водах, дзе з прыёмам марудзяць яе галоўныя пакупнікі, прыватныя незалежныя кітайскія НПЗ. Гэтыя перапрацоўшчыкі «ужо рыхтуюцца да таго, што [венесуэльскія] барэлі, якія цяпер у дарозе, могуць стаць апошнімі», кажа Мую Сю, старшы нафтавы аналітык Kpler.
Паводле дадзеных TankerTrackers.com, сярэднесутачныя пастаўкі нафты з Венесуэлы ў Кітай летась складалі 632 000 барэляў.