СБУ паказала ўламкі «Арэшніка», якім Расія ўдарыла па Львове

• 9.01.2026, 15:15

Сярод іншага знойдзены «мазг» ракеты.

СБУ прадэманстравала ўламкі расійскай балістычнай ракеты, якой войскі РФ атакавалі Львоўскую вобласць у ноч з 8 на 9 студзеня 2026 года. Абстрэл кваліфікуюць як ваеннае злачынства.

Пра гэта паведамляе Служба бяспекі Украіны.

Паводле даных следства, праваахоўнікі вызначылі месца падзення ўламкаў ракеты і вылучылі яе ключавыя элементы. Паводле папярэдняй інфармацыі, знойдзеныя камплектуючыя належаць да расійскага ракетнага комплексу «Арэшнік».

Сярод выяўленых дэталяў:

блок стабілізацыі і навядзення, які фактычна з'яўляецца «мазгом» ракеты;

элементы рухальнай устаноўкі;

фрагменты механізму арыентацыі;

саплы з платформы блока развядзення і іншыя кампаненты.

Усе ўламкі атрымалі статус рэчавых доказаў і рыхтуюцца для перадачы на паглыбленыя экспертызы.

У СБУ адзначаюць, што прымяненне гэтай ракеты па аб'ектах грамадзянскай інфраструктуры Украіны з'яўляецца ваенным злачынствам з боку Расійскай Федэрацыі.

Паводле папярэдніх даных, пуск ракеты сярэдняга радыусу дзеяння класа «зямля-зямля» быў здзейснены з расійскага палігона «Капусцін Яр».

Следчыя лічаць, што, нанёсшы ўдар паблізу мяжы з Еўрапейскім Саюзам, Крэмль спрабаваў знішчыць аб'екты жыццезабеспячэння рэгіёна на фоне рэзкага пагаршэння пагодных умоў.

Зараз СБУ ўстанаўлівае ўсе абставіны атакі, а таксама асоб, датычных да яе арганізацыі і выканання, з мэтай прыцягнення іх да адказнасці.