Трамп заявіў пра намер пачаць баевыя дзеянні ў Мексіцы

• 9.01.2026, 12:21

Прэзідэнт ЗША хоча ваяваць з картэлямі, якія «кіруюць краінай».

Прэзідэнт ЗША Дональд Трамп заявіў, што ў бліжэйшы час ЗША пачнуць баевыя дзеянні «на месцах» у Мексіцы. Ваяваць амерыканскі прэзідэнт збіраецца супраць картэляў, якія нібыта «кіруюць Мексікай».

Пра гэта Трамп заявіў у інтэрв'ю тэлеканалу Fox News.

«Мы пачнём дзейнічаць на месцах адносна картэляў. Картэлі кіруюць Мексікай. Вельмі сумна назіраць за тым, што адбылося з гэтай краінай», — заявіў ён.

Трамп дадаў, што «мы знішчылі 97% наркотыкаў, якія паступаюць водным шляхам», маючы на ўвазе шэраг удараў па лодках ля берагоў Венесуэлы. І адзначыў, што картэлі «штогод забіваюць у ЗША 300 тысяч чалавек».

«Наркотыкі... гэта жахліва. Яны спусташаюць сем'і. Вы страчваеце дзіця або бацькоў. Я маю на ўвазе, што бацькі таксама паміраюць ад наркотыкаў. Таму мы зрабілі сапраўды добрую працу», — заявіў ён.

Пры гэтым, адзначыў прэзідэнт ЗША, цяпер мяжа ЗША «зачыненая», хоць да Трампа яна, маўляў, гадамі была «ў поўным бязладдзі».

«Я зрабіў гэта ўпершыню вельмі хутка. І гэтым разам я зрабіў гэта яшчэ лепш, бо гэта быў большы бязлад. Гэта была мяжа, якой, бадай, не было ў гісторыі свету. Ніколі не было такой мяжы, дзе любы мог проста пешшу ўвайсці ў тваю краіну. Мяжа цяпер, здаецца, сапраўды зачыненая. Зачыненая. Вы не можаце зайсці. І ніхто не заходзіць. Ніхто нават не спрабуе», — запэўніў ён.

Нагадаем, што пасля ўдалай аперацыі ў Венесуэле 3 студзеня, калі быў захоплены дыктатар краіны Нікалас Мадура, Трамп выступіў з пагрозамі ў адрас Мексікі і яе прэзідэнткі Клаўдзіі Шэйнбаўм. Тады прэзідэнт ЗША таксама заявіў, што Мексікай нібыта «кіруюць картэлі» і з гэтым «трэба нешта рабіць».

Сама Шэйнбаўм пры гэтым дала зразумець, што не верыць у тое, што пагрозы прэзідэнта ЗША Дональда Трампа ўварвацца ў Мексіку сапраўды сур'ёзныя. Яна дадала, што гатовая супрацоўнічаць з ЗША ў барацьбе з незаконным абаротам наркотыкаў і асудзіла амерыканскую аперацыю ў Венесуэле.