Беларусы адказалі на «кавовую» істэрыку Лукашэнкі

• 8.01.2026, 16:19

Запраўкі «Беларуснафты» пабілі рэкорд па продажах кавы і хот-догаў.

Інфармацыйны партал «Беларуснафты» паведамляе, што ў мінулым годзе канцэрн пабіў рэкорд, як адзначае сайт blizko.by.

У 2025 годзе на фірменных АЗС «Беларуснафты» было рэалізавана 18 мільёнаў кубкаў кавы і гарбаты і 8,8 мільёна хот-догаў і фрэнч-догаў.

Гэты рэкорд асабліва цікавы тым, што быў усталяваны пасля гучнага «разносу» ад Аляксандра Лукашэнкі.

У сярэдзіне кастрычніка ён запатрабаваў навесці парадак з транспартам, які стварае перашкоды для руху на АЗС. У прыватнасці, яму даклалі, што людзі скардзяцца на вялікія чаргі на АЗС. Высветлілася, што, акрамя запраўкі аўто, людзі таксама карыстаюцца паслугамі кафэ.

Адразу пасля гэтага «Беларуснафта» выступіла з афіцыйнай заявай. А яшчэ праз некалькі дзён на аўтазапраўках Беларусі з’явіліся папярэджанні: спачатку бензін, потым кава.

Аднак продажы кавы і хот-догаў пабілі рэкорд нават нягледзячы на меры па ліквідацыі чаргаў.