Беларускае мыла трапіла пад забарону

• 8.01.2026, 14:35

У ім знайшлі таксічнае рэчыва.

Беларускае мыла ўключылі ў Рэестр небяспечнай прадукцыі Дзяржстандарта.

Гаворка ідзе пра дзіцячае мыла брэнда «Мама ведае!», забарона на яго продаж уступіць у сілу з 9 студзеня 2026-га.

Мыла трапіла пад забарону з-за неадпаведнасці прадукцыі патрабаванням тэхрэгламенту Мытнага саюза. Спецыялісты выявілі ў яго складзе рамонкавую аддушку, якая ўтрымлівае інгрэдыент этылцэллозольв.

Рэчыва, якое выкарыстоўваецца ў прадукце магілёўскага вытворцы, з'яўляецца таксічным. Адзначаецца, што гэтая вадкасць са спіртавым пахам шырока выкарыстоўваецца як універсальны растваральнік для фарбаў, лакаў і чарнілаў. Пры гэтым інгрэдыент забаронены да выкарыстання ў парфумерна-касметычнай прадукцыі.