Царкоўныя лідары назвалі Пуціна «антыхрыстам» пасля слоў пра «святую місію» ва Украіне

• 8.01.2026, 12:48

Крэмль займаецца ідалапаклонствам.

Рэлігійныя дзеячы рэзка раскрытыкавалі выказванні Пуціна, назваўшы яго «антыхрыстам» пасля таго, як ён ахарактарызаваў вайну супраць Украіны як «святую місію», піша Independent (пераклад — сайт Charter97.org).

Выступаючы ў сераду з нагоды праваслаўнага Раства, Пуцін заявіў, што расійскія салдаты дзейнічаюць «па даручэнні Госпада» і назваў іх «святымі воінамі». Гэтыя словы выклікалі абурэнне ў прадстаўнікоў хрысціянскіх цэркваў ва Украіне і ў Вялікабрытаніі.

Святар Украінскай праваслаўнай царквы айцец Міраслаў Пушкарук заявіў, што выкарыстанне гвалту і вайны пад рэлігійнымі лозунгамі супярэчыць хрысціянству. «Гэта не пра любоў і не пра хрысціянскія каштоўнасці. Такія паводзіны больш падобныя на антыхрыста», — сказаў ён.

Раней Сінод Украінскай праваслаўнай царквы прызнаў ідэалогію «Рускага свету», якую Крэмль выкарыстоўвае для апраўдання вайны, ерассю. Гэтая канцэпцыя прадугледжвае, што Расія, Украіна і Беларусь нібыта складаюць «Святую Русь». У снежні больш за 90 царкоўных лідароў на канферэнцыі ў Хельсінкі асудзілі гэтае вучэнне.

Былы біскуп Лідса Нік Бэйнс падкрэсліў, што «нельга выкарыстоўваць няправедныя сродкі дзеля нібыта святой мэты», асабліва калі гаворка ідзе пра ўварванне і гібель людзей.

Каталіцкі святар і выкладчык Універсітэта Хоўп у Ліверпулі айцец Тарас Хоміч назваў рэлігійную рыторыку Пуціна «ідалапаклонствам» і «д’ябальскім скажэннем хрысціянства», якое праслаўляе вайну і смерць дзеля тэрытарыяльных прэтэнзій.

На фоне мірных перамоў, што працягваюцца пры падтрымцы ЗША, свяшчэннаслужыцелі папярэджваюць: без адмаўлення ад гэтай ідэалогіі дамагчыся спынення агню будзе надзвычай складана.