Расіяне баяцца выводзіць караблі ў Азоўскае мора

• 8.01.2026, 11:32

У ВМС Украіны назвалі прычыны.

Расійскія войскі мінімізуюць выхады сваіх караблёў у акваторыю Азоўскага мора з-за абмежаванасці маршрутаў для навігацыі і з-за вялікіх рызык быць паражанымі.

Пра гэта заявіў спікер ВМС Узброеных Сіл Украіны Дзмітрый Плетэнчук, паведамляе РБК-Украіна са спасылкай на эфір нацыянальнага тэлемарафону.

«Знаходзіцца там (у Азоўскім моры - рэд.) няма дзе і ў плане базавання, і ў плане навігацыі. Гэта няглыбокае мора - максімальна 15 метраў - таму рэкамендаваныя шляхі там даволі вузкія», - адзначыў Плетэнчук.

Паводле яго слоў, калі расіяне заходзяць у Азоўскае мора, то змешваюць свае караблі з грамадзянскімі, каб такім чынам прыкрыцца.

«Але сказаць, што яны там пастаянна знаходзяцца, я не магу, бо вораг разумее, што ўся тэрыторыя Азоўскага мора пад нашым агнёвым кантролем», - дадаў ён.