Украінская разведка зайшла глыбока ў тыл ворага

• 7.01.2026, 15:46

Байцы ГУР знішчылі расійскіх вайскоўцаў і атрымалі разведдадзеныя.

Падраздзяленне Галоўнага ўпраўлення разведкі Мінабароны Украіны «Братэрства» правяло глыбокі рэйд у тыл расіян на Запарожскім кірунку, знішчыла некалькі акупантаў, а таксама атрымала разведінфармацыю пра пазіцыі і сілы ворага.

Пра гэта ў сераду, 7 студзеня, ГУР паведаміла ў сацсетках.

Там адзначылі, што байцы падраздзялення «Братэрства», якое ўваходзіць у Спецпадраздзяленне Цімура, у снежні 2025 года паспяхова правялі глыбокую дыверсійна-разведвальную аперацыю ў тыле расійскіх войскаў на Запарожскім кірунку, у раёне Кахоўскага вадасховішча.

Паводле дадзеных разведкі, падчас рэйду ўкраінскія вайскоўцы знішчылі дваіх акупантаў, яшчэ дваіх паранілі і ўзялі дваіх у палон.

Пасля гэтага група здзейсніла складанае і працяглае суправаджэнне палонных на падкантрольную Украіне тэрыторыю, пераадолеўшы каля 27 кіламетраў.