У Мінску злавілі «Грынча»

• 7.01.2026, 13:09

Працаўнік гандлёвага цэнтра за месяц вынес 18 штучных ёлак.

У Мінску праваахоўнікі затрымалі 64-гадовага супрацоўніка гандлёвага цэнтра, якога падазраюць у серыі крадзяжоў штучных навагодніх ёлак. Паводле звестак міліцыі, мужчына за месяц вынес з гандлёвага цэнтра 18 ёлак.

У сацсетках яго ўжо празвалі «Грынчам» — па аналагіі з персанажам папулярнага галівудскага фільма, які ўкраў Каляды.

Парушэнне заўважыў работнік аднаго з гандлёвых павільёнаў. Высветлілася, што крама не была абсталяваная ахоўнай сігналізацыяй і ўначы заставалася адкрытай.

Паводле інфармацыі міліцыі, мужчына вывозіў ёлкі ў прадуктовым вазку, накрываючы іх пакрывалам, пасля чаго перапрадаў тавар. Атрыманыя грошы ён траціў на асабістыя патрэбы.

Агульная шкода перавысіла 10,8 тысячы рублёў. У дачыненні да затрыманага распачата крымінальная справа па факце крадзяжу.