Трамп паабяцаў паскорыць вытворчасць зброі для саюзнікаў ЗША

• 6.01.2026, 23:15

Каб паставак не чакалі гадамі.

Прэзідэнт ЗША паабяцаў, што амерыканскія абаронныя кампаніі паскораць вытворчасць зброі для саюзнікаў, каб скаротзіць шматгадовыя тэрміны паставак самалётаў і верталётаў.

Пра гэта Дональд Трамп заявіў у аўторак, 6 студзеня, на сустрэчы з кангрэсменамі ад Рэспубліканскай партыі.

Паводле слоў прэзідэнта, цяпер вытворчасць высокадакладнай зброі займае занадта шмат часу, з-за чаго саюзнікі вымушаныя чакаць гадамі. Ён прывёў прыклад знішчальнікаў F-35, для якіх тэрміны выканання занадта доўгія, а таксама заказу Індыі на 68 верталётаў Apache, які дагэтуль не выкананы.

«Ніхто не мае такой якасці, як наша зброя. Праблема толькі ў тым, што мы вырабляем яе недастаткова хутка. Мы пачнём рабіць гэта значна хутчэй. Будзем строгімі да кампаній-вытворцаў. У нас лепшая зброя ў свеце. Але на яе вытворчасць патрэбна занадта шмат часу. У тым ліку для саюзнікаў. Калі саюзнікі хочуць купіць зброю, ім даводзіцца чакаць самалёта чатыры гады і верталёта пяць гадоў. Мы не дазволім гэтаму паўтарыцца», — падкрэсліў Дональд Трамп.

Ён дадаў, што цяпер будзе строга кантраляваць абаронныя кампаніі, каб пазбегнуць затрымак у пастаўках ваеннай тэхнікі.

Новыя патрабаванні будуць прадугледжваць паскораную вытворчасць самалётаў, верталётаў і іншага ўзбраення, каб саюзнікі атрымлівалі яго своечасова.

Паводле прэзідэнта, гэтыя крокі павінны ўмацаваць абараназдольнасць саюзнікаў ЗША і павысіць хуткасць рэагавання на магчымыя пагрозы, асабліва на фоне глабальнай нестабільнасці і растучых патрэбаў у сучасным узбраенні.