У Беларусі адменілі некаторыя падатковыя ільготы

• 6.01.2026, 16:53

Якія і каго яны закрануць?

У Беларусі адменілі некаторыя падатковыя ільготы. Змены закранаюць як насельніцтва, так і індывідуальных прадпрымальнікаў і арганізацыі. Новаўвядзенні прадугледжаныя папраўкамі ў Падатковы кодэкс, паведамляе «Зеркало».

Так, улады ўстанавілі роўныя стаўкі транспартнага падатку для індывідуальных прадпрымальнікаў і юрыдычных асоб. Раней для гэтых катэгорый дзейнічалі розныя ўмовы падаткаабкладання.

Адменены ільготы па падатку на нерухомасць і зямельным падатку для фізічных асоб у дачыненні да аб’ектаў, якія маюць статус гісторыка-культурных каштоўнасцяў, а таксама зямельных участкаў, на якіх яны размешчаныя.

Змены закранулі і падатак на дабаўленую вартасць. Адменена ільгота па ПДВ з абаротаў па рэалізацыі маёмасных правоў на вынікі навукова-тэхнічнай дзейнасці, а таксама матэрыяльных аб’ектаў, звязаных з гэтымі правамі.

Акрамя таго, індывідуальныя прадпрымальнікі страцілі ільготу па падаходным падатку ў частцы даходаў ад удзелу ў простым таварыстве.

Для арганізацый, якія працуюць у сферы адукацыі і аховы здароўя, адменены ільготы па падатку на нерухомасць і зямельным падатку.