Расійскіх афіцэраў ахапіла паніка

• 6.01.2026, 18:45

Яны масава падаюць рапарты з просьбай аб пераводзе ў тыл.

На Пакроўскім накірунку сярод расійскіх вайскоўцаў назіраецца рэзкае падзенне матывацыі каманднага складу.

Пра гэта паведамляе партызанскі рух «АТЕШ».

Паводле звестак партызанаў, афіцэры Узброеных Сіл РФ у падраздзяленнях 39-й гвардзейскай мотастралковай брыгады масава падаюць рапарты з просьбай аб пераводзе ў тыл або на менш актыўныя ўчасткі фронту.

Камандаванне са свайго боку спрабуе ўтрымаць афіцэраў на пазіцыях ціскам — пагражае дысцыплінарнымі спагнаннямі, паніжэннем па службе і блакіроўкай далейшай кар’еры. Акрамя таго, іх жорстка абвінавачваюць у страце пазіцый іх падначаленымі і патрабуюць падаваць справаздачы аб «стабільнай абстаноўцы», якой фактычна няма.

Таксама расійскіх камандзіраў змушаюць падпісваць дакументы, якія не адпавядаюць рэальнай сітуацыі на фронце.

У «АТЕШ» адзначаюць, што большасць афіцэраў дэмаралізаваныя, дрэнна арыентуюцца ў мясцовасці і ўспрымаюць службу на Пакроўскім накірунку як небяспечнае сасланне. Яны пастаянна баяцца ўдараў Сіл абароны Украіны, дзеянняў партызанаў і ўцечкі інфармацыі пра свае камандныя пункты і маршруты перамяшчэння.