Кіраўнік літоўскіх аўтаперавозчыкаў: Фуры па-ранейшаму заблакаваныя ў Беларусі

• 5.01.2026, 18:12

Прагрэсу ў іх вяртанні няма.

Літоўская нацыянальная асацыяцыя аўтаперавозчыкаў LINAVA рыхтуе калектыўны пазоў да ўрада сваёй краіны з-за фур, якія затрымаліся на тэрыторыі Беларусі, заявіў яе кіраўнік Эрландас Мікенас.

«Ніякіх зрухаў, што да вяртання фур, у нас няма. Няма ніякіх навін ні з Беларусі, ні з боку ўрада», — цытуе яго Delfi.

«Пры садзейнічанні адвакатаў мы звернемся да ўрада, — сказаў Мікенас. — Планы будуць вызначаныя адвакатскімі канторамі, але яны прыблізна зразумелыя — спачатку мы будзем шукаць рашэнні мірным шляхам, а калі гэта не ўдасца, у нас ёсць і іншыя».

Паводле слоў кіраўніка асацыяцыі, у канцы снежня яе члены сустрэліся з прадстаўнікамі Міністэрства транспарту і камунікацый, дзе «прыйшлі да дамоўленасці, што першачарговай задачай павінна быць вяртанне фур, якія затрымаліся ў Беларусі, а не іх дакладны падлік».