Ля берагоў Нямеччыны ўпершыню прайшоў танкер-«зомбі»

• 5.01.2026, 5:22

Ён перавозіў расійскую нафту.

На пачатку снежня міма балтыйскага ўзбярэжжа Нямеччыны ўпершыню прайшоў расійскі танкер, які ў марской галіне адносяць да так званых танкераў-«зомбі» — старых суднаў з незаконна змененым унікальным ідэнтыфікацыйным нумарам Міжнароднай марской арганізацыі (IMO). Як высветліў The Insider, судна неаднаразова заходзіла ў расійскія парты, у прыватнасці ў Прыморск.

Пра гэта паведаміла Deutsche Welle, інфармацыю выданню пацвердзілі ў нямецкай дзяржаўнай Службе бяспекі суднаходства (Dienststelle Schiffssicherheit).

Пад падазрэнне трапіў нафтавы танкер Tavian, які прайшоў праз Балтыйскае мора з грузам расійскай нафты. Судна выкарыстоўвае нумар IMO 1095337, які, паводле дадзеных ведамства, можа быць падробленым. Паводле ацэнак нямецкіх спецыялістаў, Tavian насамрэч з’яўляецца танкерам Tia, раней зарэгістраваным пад нумарам IMO 9147447. У такім выпадку гаворка ідзе пра адзін з самых старых буйных нафтавых танкераў, што дагэтуль застаюцца ў эксплуатацыі. У Службе бяспекі суднаходства падкрэслілі, што гэта першы зафіксаваны выпадак з’яўлення танкера-«зомбі» ля берагоў Нямеччыны.

Пра судна ўпершыню паведаміў галінавы часопіс Lloyd’s List 18 лістапада. Выданне аднесла Tia да «ценявога флоту» і адзначыла, што выкарыстаны ім нумар IMO цалкам сфабрыкаваны і адсутнічае ў базе даных Міжнароднай марской арганізацыі. У жніўні 2024 года танкер трапіў пад санкцыі ЗША.