У Беларусі ўступілі ў сілу новыя абмежаванні на продаж піва

• 4.01.2026, 15:55

Што змянілася з 1 студзеня?

З 1 студзеня ў Беларусі дзейнічае забарона на продаж піва і слабаспіртовых напояў у пластыкавай тары аб'ёмам больш за 1,5 літра. Пра гэта сведчыць пастанова ўрада, апублікаваная на Нацыянальным прававым партале, піша «Зеркало».

Першапачаткова ўлады планавалі ўвесці гэтае абмежаванне з 1 студзеня 2025 года, аднак пазней тэрмін перанеслі яшчэ на год.

Пры гэтым для бізнесу прадугледжаны пераходны перыяд: юрыдычныя асобы і індывідуальныя прадпрымальнікі, у якіх засталіся нерэалізаваныя запасы піва і слабаспіртовых напояў крэпасцю да 7%, могуць іх распрадаваць.

У папярэдняй рэдакцыі правілаў продажу асобных відаў тавараў і ажыццяўлення грамадскага харчавання дзейнічала менш строгая забарона — яна датычылася піва крэпасцю да 7% у ёмістасцях аб'ёмам больш за 2 літры.