Міністр абароны Германіі: Расія не дэманструе гатоўнасці да міру

• 31.01.2026, 22:04

Дзеянні Крамля супярэчаць заявам аб перамовах.

Міністр абароны Германіі Барыс Пісторыус выказаў сумневы ў тым, што кіраўнік Расіі Уладзімір Пуцін насамрэч імкнецца да міру.

Пра гэта Пісторыус заявіў медыягрупе RND, перадае DW.

Паводле слоў міністра, хоць прэзідэнт ЗША Дональд Трамп надаў новы імпульс дыпламатычным намаганням, скіраваным на дасягненне міру, апошнія дзеянні Масквы, здаецца, сведчаць пра адваротнае.

«На дадзены момант [...] я не бачу ніякіх прыкмет таго, што Расія сур'ёзна імкнецца да міру», — сказаў Пісторыус, адзначыўшы, што нават падчас нядаўніх перамоваў пад эгідай ЗША ў Абу-Дабі Пуцін напаў на Украіну «такім чынам, якога яшчэ не бачылі ў гэтай вайне».

Пісторыус таксама адкінуў сцверджанне Крамля пра тое, што яго атакі ніколі не былі скіраваныя супраць мірнага насельніцтва або цывільнай інфраструктуры, сказаўшы: «Гэта тэрор, скіраваны выключна супраць мірнага насельніцтва зімой пры тэмпературы мінус 20 градусаў».

Міністр дадаў, што Пуцін не праяўляе ніякай гатоўнасці да кампрамісу.