Краіны Балтыі ствараюць адзіную прастору ваеннай мабільнасці
- 31.01.2026, 19:39
Пагадненне падпісалі міністры абароны Літвы, Латвіі і Эстоніі.
Міністры абароны Балтыі ў пятніцу дамовіліся аб стварэнні адзінай прасторы ваеннай мабільнасці, якая спрасціць перамяшчэнне войскаў, узмацніць абарону ўсходняга флангу НАТА і скараціць бюракратыю ў крызісных сітуацыях.
Адпаведнае пагадненне было падпісана ў Таліне 30 студзеня, паведамляе err.ee.
Паводле слоў міністра абароны Эстоніі Ханны Пэўкура, гэтая дамоўленасць у першую чаргу накіраваная на скарачэнне бюракратычных працэдур пры сумесных закупках, перадачы ўзбраення і перамяшчэнні вайскоўцаў паміж краінамі.
«Гэта для нас вельмі важна, таму што калі мы паедзем на вучэнні ў Латвію, то трэба вельмі шмат папер афармляць. Цяпер мы паспрабуем зрабіць так, каб такіх папер амаль не было, або, калі трэба, то вельмі мала», — патлумачыў Пэўкур.
Праект ваеннай мабільнасці, запушчаны ў 2023 годзе пры каардынацыі НАТА, накіраваны на забеспячэнне бесперашкоднага перасоўвання ўзброеных сіл паміж краінамі. У перспектыве ён павінен ахапіць усю Еўропу.
«У выпадку неабходнасці літоўская ваенная тэхніка зможа бесперашкодна перамяшчацца для абароны Рыгі, эстонская артылерыя — падтрымліваць Вільнюс, латвійскія сілы — узмацняць Талін, і наадварот. У перыяд крызісу кожная гадзіна мае значэнне, і бюракратычныя бар'еры не павінны запавольваць нашы абаронныя і стрымліваючыя магчымасці», — сказаў міністр абароны Літвы Робертас Каунас.
Міністры абароны Літвы, Латвіі і Эстоніі таксама абмеркавалі пытанні ўмацавання бяспекі НАТА і парадак дня маючай адбыцца сустрэчы міністраў абароны краін Альянсу.
«Мы разам будуем НАТА і перакананыя, што альянс застанецца краевугольным каменем нашай бяспекі. У сувязі з гэтым асабліва важна, каб мы ўносілі істотны ўклад. Інвестуючы каля 5% ВУП у абарону, мы дэманструем лідарства і падаем прыклад іншым краінам, паказваючы, што ў бяспеку трэба інвеставаць ужо цяпер», — сказаў міністр абароны Латвіі Андрыс Спрудс.
У нядаўна апублікаванай абароннай стратэгіі ЗША зноў падкрэсліваецца намер скараціць удзел у забеспячэнні бяспекі Еўропы. На дадзены момант у кожнай з краін Балтыі размешчаны амерыканскі батальён. Міністры абароны трох краін Балтыі маюць намер працягваць працу па ўмацаванні абароннага супрацоўніцтва з ЗША.
«Сёння мы бачым, што цягам года было прынята мноства рашэнняў па розных напрамках, прычым некаторыя з іх пасля пераглядаліся. Таму сцвярджаць, што бягучая сітуацыя захаваецца на год, два ці тры, немагчыма. У сувязі з гэтым мы павінны працаваць над тым, каб гэтыя адносіны заставаліся добрымі», — сказаў Пэўкур.