Reuters: Украінцам трэба пратрымацца тры тыдні

• 31.01.2026, 14:30

Потым будзе лягчэй.

Наступныя тры тыдні будуць складанымі для ўкраінцаў з-за паніжэння тэмпературы і пашкоджанай расійскімі ўдарамі энергетычнай інфраструктуры. Абстрэлы РФ пазбавілі мільёны людзей святла і цяпла.

Пра гэта гаворыцца ў матэрыяле Reuters.

Паводле прагнозаў сіноптыкаў, ужо на наступным тыдні на поўначы і ўсходзе Украіны чакаецца тэмпература ніжэй за -20°, надзвычай нізкая для краіны.

«Дрэнная навіна ў тым, што маразы сапраўды будуць, і гэта будзе складана. Добрая навіна ў тым, што нам трэба пратрымацца тры тыдні, потым будзе лягчэй», — заявіў старшыня парламенцкага камітэта па энергетыцы Андрэй Герус.

Палітык растлумачыў, што сітуацыя можа палепшыцца дзякуючы пацяпленню і росту вытворчасці сонечнай энергіі з-за павелічэння працягласці светлавога дня.

Моцныя ўдары па энергетыцы

Дзве апошнія масіраваныя атакі Расіі на Кіеў у студзені пакінулі каля мільёна людзей без святла і шэсць тысяч шматкватэрных дамоў без ацяплення. Пасля тыдняў рамонтных прац каля 700 дагэтуль не маюць цяпла.

Выданне адзначае, што падобная карціна паўтараецца па ўсёй краіне. У прыватнасці, поўнач і ўсход краіны, дзе знаходзяцца такія вялікія гарады, як Кіеў, Харкаў, Чарнігаў і Сумы, рэгулярна падвяргаюцца атакам. Гэта прыводзіць да абмежаванняў электразабеспячэння для прамысловасці і адключэнняў электраэнергіі для спажыўцоў.

Атакі на электрастанцыі, сістэму перадачы энергіі і газавы сектар ужо даўно з'яўляюцца ключавымі элементамі паўнамаштабнага ўварвання РФ. Масква заяўляе, што імкнецца падарваць баяздольнасць Украіны.