У паветры Фінляндыі выяўлены радыёактыўныя рэчывы

• 31.01.2026, 1:07

Іх крыніца невядомая.

У некалькіх гарадах Фінляндыі ў паветры былі выяўленыя невялікія канцэнтрацыі радыёактыўных рэчываў. Пра гэта 30 студзеня паведаміла Служба радыяцыйнай бяспекі краіны (STUK).

У перыяд з 12-га па 19 студзеня ў Раваніемі выявілі марганец (Mn-54), жалеза (Fe-59) і кобальт (Co-60). У Куопіа зафіксавалі толькі кобальт, а ў Іматры — марганец, жалеза, кобальт і ніобій (Nb-95).

Як патлумачылі ў STUK, такія радыёактыўныя рэчывы могуць утварацца пры працы атамных электрастанцый і трапляць у паветра падчас тэхнічнага абслугоўвання. У той жа час крыніца гэтых рэчываў у асноўным застаецца невядомай, але ў гэтым выпадку пацверджана, што яны не паходзяць з фінскіх АЭС.

Паводле дадзеных ведамства, канцэнтрацыі былі вельмі нізкімі і не ўяўлялі небяспекі для людзей ці навакольнага асяроддзя.

STUK адсочвае радыёактыўныя рэчывы на васьмі станцыях у Фінляндыі, збіраючы вялікія аб’ёмы паветра для вымярэння часцінак на спецыяльных фільтрах. Дзякуючы гэтаму метаду можна выяўляць нават вельмі нізкія канцэнтрацыі радыёактыўных рэчываў.