Ракетны ўдар пашкодзіў фабрыку амерыканскай кампаніі Philip Morris пад Харкавам

• 30.01.2026, 20:11

Фотафакт.

30 студзеня ў выніку начнога ракетнага ўдару была пашкоджана частка фабрыкі амерыканскай кампаніі Philip Morris пад Харкавам. Пра гэта паведаміла РБК-Украіна са спасылкай на прэс-службу тытунёвай кампаніі.

«Найважнейшае — паводле папярэдняй інфармацыі, пацярпелых няма. Увесь дзяжурны персанал знаходзіўся ў сховішчы. Кампанія знаходзіцца ў пастаянным кантакце з экстрэннымі службамі і аказвае неабходнае садзейнічанне», — цытуе СМІ паведамленне Philip Morris.

У кампаніі таксама падкрэслілі, што яны працягваюць выконваць свае абавязацельствы «перад дзяржавай, партнёрамі і спажыўцамі», а падрабязнасці здарэння ўдакладняць дадаткова.

Дзяржаўная служба Украіны па надзвычайных сітуацыях у Харкаўскай вобласці (ДСНС) апублікавала ў Telegram фота наступстваў ракетнага ўдару па складскім будынку. У паведамленні не ўказваюць назву прадпрыемства, аднак, верагодна, ідзе гаворка менавіта пра фабрыку Philip Morris.

«Расійскія акупацыйныя войскі нанеслі ракетны ўдар па складскім будынку грамадзянскага прадпрыемства ў прыгарадзе Харкава: узнік маштабны пажар плошчай больш за 5 тыс. м². Будаўнічыя канструкцыі атрымалі значныя пашкоджанні. Папярэдне, абышлося без пацярпелых», — гаворыцца ў паведамленні выратавальнікаў.

Як праінфармавала РБК-Украіна, праца харкаўскай фабрыкі Philip Morris была спыненая з пачатку поўнамаштабнага ўварвання 24 лютага 2022 года. У 2024-м кампанія адкрыла новы завод у Львоўскай вобласці, інвеставаўшы $30 млн і рэлакаваўшы туды 250 супрацоўнікаў з Харкава.