У Польшчы далі старт стварэнню найноўшай сістэмы барацьбы з дронамі San

• 30.01.2026, 14:27

Яна будзе выкарыстоўвацца ў межах сістэмы «Усходні шчыт».

У пятніцу ў Польшчы падпісалі кантракт на распрацоўку і пастаўку найноўшай антыдроннай сістэмы San, якая будзе выкарыстоўвацца ў межах сістэмы «Усходні шчыт».

Пра гэта паведаміла польскае агенцтва PAP.

Цырымонія падпісання адбылася на прадпрыемстве PIT-Radwar у Кобылцы пад Варшавай з удзелам прэм’ера Дональда Туска і міністра абароны Уладзіслава Касіняка-Камыша.

Кантракт заключылі Польскае агенцтва ўзбраенняў і кансорцыум, у які ўвайшлі Polska Grupa Zbrojeniowa (PGZ), кампанія APS і нарвежскі абаронны гігант Kongsberg.

Праект разлічаны на хуткую рэалізацыю, праграму плануюць завяршыць за два гады. Паводле неафіцыйных даных, кошт кантракта складае каля 15 млрд злотых (прыблізна 3,6 млрд еўра).

Прэм’ер-міністр Дональд Туск назваў гэтае здарэнне гістарычным, падкрэсліўшы, што сістэма San стане ключавым элементам ініцыятывы «Усходні шчыт».

«Мы маем справу з абсалютным прарывам у пытанні эфектыўнай, дзейнай абароны ўсходняй мяжы Польшчы, Еўропы і НАТА, і гэта ў найбольш адчувальным элеменце, якім з’яўляецца супрацьпаветраная абарона, перадусім абарона ад сучасных тэхнік агрэсіі», — заявіў Дональд Туск.

Ён таксама падкрэсліў, што для Польшчы прынцыпова важна, каб «Усходні шчыт» надзейна ахоўваў неба ад найноўшых пагроз, а прыцягненне нарвежскага досведу праз кампанію Kongsberg гарантуе найвышэйшы ўзровень тэхналогій.

San — гэта комплексная шматузроўневая сістэма абароны, у склад якой увайдуць 30-мм гарматы, што выкарыстоўваюць праграмуемыя боепрыпасы, нядорагія высокадакладныя ракеты APKWS, дроны-перахопнікі, прызначаныя для знішчэння варожых БПЛА ў паветры, і сенсары, што дазваляюць бачыць мэты, якія «хаваюцца» ад РЭБ.