Найбагацейшая краіна Еўропы вырашыла павысіць падаткі дзеля ўмацавання абароназдольнасці

• 30.01.2026, 8:29

Новы падатак будзе часовым — на 10 гадоў.

З-за пагаршэння геапалітычнай сітуацыі Федэральны савет Швейцарыі вырашыў істотна ўмацаваць абароназдольнасць, дзеля чаго давядзецца павысіць падаткі. Пра гэта гаворыцца ў прэс-рэлізе швейцарскага ўрада.

Адзначаецца, што на ўзмацненне швейцарскай арміі і грамадзянскіх службаў бяспекі спатрэбяцца дадатковыя сродкі ў памеры каля 31 мільярда швейцарскіх франкаў (прыблізна 33,8 мільярда еўра).

Каб прафінансаваць гэтыя выдаткі, урад прапануе часова і мэтава павысіць падатак на дададзеную вартасць (ПДВ) на 0,8 працэнтнага пункта, пачынаючы з 2028 года і на перыяд дзесяці гадоў. Дадатковыя паступленні будуць накіроўвацца ў спецыяльны фонд узбраення, які будзе мець магчымасць прыцягваць пазыкі. Першачаргова гэтыя сродкі будуць выкарыстоўвацца на закуп узбраення для арміі.

«Дадатковыя фінансавыя рэсурсы неабходныя для абароны насельніцтва і краіны, а таксама для таго, каб у будучыні пазбегнуць любых рызык для бяспекі ў еўрапейскай абароннай архітэктуры; запланаванае павелічэнне выдаткаў арміі да 1% ВУП да 2032 года недастаткова», — адзначаецца ў прэс-рэлізе.

Паводле дзеючых у Швейцарыі правілаў, пасля таго як адпаведнае рашэнне будзе аформлена і праведзена праз парламент, яго павінен ухваліць усеагульны рэферэндум прыблізна летам 2027 года. У выпадку ўхвалення павышэнне ПДВ уступіць у сілу з 1 студзеня 2028 года.