Лукашысты зноў абараняюцца ад макарон і падгузнікаў
- 3.01.2026, 18:52
Забарона на імпарт «недружалюбных» тавараў падоўжана яшчэ на два гады.
Урад Беларусі зноў дастаў з шафы ўлюбёную папку з надпісам «Недружалюбныя краіны» і ўрачыста падоўжыў забарону на ўвоз і рэалізацыю на тэрыторыі краіны асобных тавараў з так званых недружалюбных краін да 31 снежня 2027 года, піша «Беларусы і рынак».
Савет Міністраў РБ прыняў пастанову «Аб прымяненні спецыяльнай абмежавальнай меры», апублікаваную 1 студзеня 2026 года. Фармуляванне старое і даўно надакучыла: «абарона нацыянальных інтарэсаў ва ўмовах неаслабнага санкцыйнага ціску».
Ціск, судзячы па спісах, асабліва жорстка праяўляецца ў выглядзе морквы, макарон і мінеральнай вады. «Ворагі суверэнітэту» паводле спіса — усе краіны Еўразвязу і ЗША, а таксама Вялікабрытанія. У першым пераліку — універсальныя пагрозы дзяржаўнасці:
мясная і малочная прадукцыя
морква і буракі
арэхі і тлушч
каўбасы, кандытарскія вырабы, макароны
мінеральная вада і піва
Каб грамадзяне не расслабляліся, дадалі і нехарчовыя тавары: шыны, некаторыя віды паперы, будаўнічыя матэрыялы. Суверэнітэт павінен адчувацца і на дарозе, і ў рамонце.
Асабліва небяспечныя краіны і асабліва небяспечныя рэчы
У другім пераліку асобна вылучаны Літва, Латвія, Польшча, Чэхія і Эстонія. Адтуль, на думку ўладаў, паходзіць максімальная пагроза:
кандытарскія вырабы, падгузнікі, халадзільнікі і сродкі для валасоў — з усіх пяці краін
малако, садавіна і арэхі — з Літвы
джэмы, алкаголь і сродкі для зубоў — з Латвіі
касметыка — амаль з усіх, акрамя Польшчы
шыны
асобныя віды паперы
будаўнічыя матэрыялы
падгузнікі
халадзільнікі
Лёгіка забойная: халадзільнік з Польшчы — дыверсія, шампунь з Чэхіі — гібрыдная атака. А яшчэ пісаць на замежнай паперы нельга, будаваць нельга, дзяцей выхоўваць небяспечна, захоўваць ежу няма дзе, мыцца таксама.
Але вось дзіўна, што са спісу забароненых кудысьці падзеліся бульба і яблыкі. Падобна, бульба пакуль па-за геапалітыкай. Так, забарона не распаўсюджваецца на:
тавары для асабістага карыстання фізічных асоб
ўвоз юрыдычнымі асобамі, уключанымі ў рэестр уладальнікаў duty free
піва, увезенае да 1 красавіка 2026 года, акрамя тавараў з пяці «асабліва недружалюбных» краін
Спісы, як падкрэсліваюць улады, абнаўляюцца! Гэта значыць, што калі раптам нешта з прылаўкаў беларускіх крамаў знікне і «моцныя гаспадарнікі» прамахнуцца, то вазіць тавары дазволяць. Так ужо было, напрыклад, у сакавіку 2025 года, з забароны раптам выключылі літоўскі секанд-хэнд. Відаць, ціск санкцый аказаўся не гатовы да беларускай рэчаіснасці.