Аляксандр Каваленка: ЗША могуць звяргнуць дыктатара ў любой кропцы свету

• 3.01.2026, 23:37

Патрэбна толькі палітычная воля.

Аб гэтым сайту Charter97.org заявіў украінскі ваенна-палітычны аглядальнік групы «Інфармацыйны супраціў» Аляксандр Каваленка, каментуючы аперацыю ЗША па захопе венесуэльскага дыктатара Нікаласа Мадура:

— Усё адбылося даволі хутка, як мы бачым. Падрыхтоўка з боку Злучаных Штатаў заняла некалькі месяцаў.

Звяржэнне Нікаласа Мадура павінна было адбывацца не толькі праз ваенную аперацыю, але і пры садзейнічанні ўнутраных агентурных сетак, якія актывізаваліся цягам усяго гэтага часу.

Усім было выдатна зразумела, што ваенная аперацыя супраць Венесуэлы адбудзецца. Але ў якім менавіта фармаце? А ў фармаце таго, што будуць задзейнічаныя не толькі Узброеныя сілы Злучаных Штатаў, але і ўнутраны пратэстны элемент. А ў Венесуэле, як вядома, пратэстны элемент быў каталізаваны ўжо даўно, некалькі гадоў таму.

Пра што гэта кажа? Венесуэла — яскравы прыклад таго, што Злучаныя Штаты, калі ёсць такое жаданне, могуць падрыхтаваць аперацыю па звяржэнні дыктатара ў любой кропцы свету — Ірак, Венесуэла, гэта можа быць якая-небудзь іншая краіна. Галоўнае — жаданне і рашучасць. Але пакуль Злучаныя Штаты кіруюцца выключна сваімі асабістымі планамі, поглядамі Дональда Трампа.

І Венесуэла Злучаным Штатам патрэбная не толькі як дэмакратычная краіна, але і як краіна, якая забяспечвала б іх нафтапрадукцыяй. Магчыма, хто-небудзь не ведае, але ў Каракаса найбуйнейшыя запасы нафты ў свеце.

Злучаныя Штаты, маючы кантроль над гэтымі рэсурсамі, будуць мець магчымасць выціскаць іншых канкурэнтаў з рынку. Для іх гэта вельмі важная задача. Таму мы можам сказаць, што ў Венесуэле была праведзеная спецыяльная ваенная аперацыя, якая заняла менш за 24 гадзіны.

— Што далей чакае Венесуэлу?

— Змена ўлады, прыход апазіцыйнага лідара. Сур'ёзнага супраціву не будзе.

Магчыма, будуць пэўныя асяродкі супраціву прыхільнікаў Мадура, але я думаю, што гэта будзе нешта на ўзроўні лакальных партызанскіх сутычак.