CBS News: ЗША збіраліся нанесці ўдар па Венесуэле яшчэ на Каляды

• 3.01.2026, 12:52

Аперацыя была перанесеная з-за пагодных умоў.

Прэзідэнт ЗША Дональд Трамп ухваліў нанясенне удараў па Венесуэле яшчэ некалькі дзён таму. Пра гэта CBS News паведамілі двое амерыканскіх чыноўнікаў.

«Прэзідэнт Трамп даў амерыканскім вайскоўцам зялёнае святло на нанясенне наземных удараў па Венесуэле за некалькі дзён да пачатку самой аперацыі», — піша выданне.

Пры гэтым, паводле дадзеных крыніц, вайсковыя чыноўнікі абмяркоўвалі магчымасць правядзення місіі на Каляды, але прыярытэт быў аддадзены авіяўдарам ЗША ў Нігерыі па цэлях ІДІЛ.

У дні пасля Калядаў з’явілася больш патэнцыйных магчымасцяў для нанясення удараў амерыканскімі вайскоўцамі, але аперацыя была адкладзеная з-за пагодных умоў.

Чыноўнікі заявілі, што амерыканскім вайскоўцам былі патрэбныя пагодныя ўмовы, максімальна спрыяльныя для поспеху місіі.

Сёння ўначы у сталіцы Венесуэлы Каракасе гучалі выбухі, над горадам працуе ППА, на вуліцы выведзеная ваенная тэхніка. Паведамляецца, што абстрэлу падвергліся рэзідэнцыя міністра абароны Венесуэлы і порт у сталіцы краіны.

Белы дом афіцыйна не каментаваў аперацыю, але, паводле дадзеных СМІ, прэзідэнт ЗША Дональд Трамп загадаў нанесці ўдары па аб’ектах унутры Венесуэлы, у тым ліку па вайсковых аб’ектах.

Лідар Венесуэлы Нікалас Мадура падпісаў указ аб увядзенні надзвычайнага становішча ў сувязі з нападам на краіну.