ЗША па загадзе Трампа правялі ваенную аперацыю ў Венесуэле
- 3.01.2026, 10:08
Дыктатар Мадура затрыманы амерыканскімі вайскоўцамі і вывезены з краіны.
У сталіцы Венесуэлы Каракасе раніцай суботы, 3 студзеня, жыхары чулі выбухі і пралятанне самалётаў, а таксама бачылі слупы дыму. Паўднёвая частка горада, у прыватнасці раён паблізу буйной вайсковай базы, засталася без электразабеспячэння.
Пра гэта паведамляе Reuters.
15.59
Супраць венесуэльскага дыктатара Нікаласа Мадуры і ягонай жонкі, Сіліі Флорэс, вылучылі афіцыйныя абвінавачанні. Ім абодвум інкрымінуюць змову з мэтай наркатэрарызму.
Пра гэта паведаміла генеральная пракурорка ЗША Памэла Бонды. Абвінавачанне вынес Паўднёвы акруг Нью-Ёрка.
14.29
Марко Рубіё: Мадура арыштаваны амерыканскімі вайскоўцамі для правядзення судовага разбору.
Сенатар-рэспубліканец Майк Лі заявіў, што пагаварыў з дзяржсакратаром ЗША Маркам Рубіё. Рубіё паведаміў яму, што Мадура быў арыштаваны амерыканскімі вайскоўцамі для правядзення судовага разбору па крымінальных абвінавачваннях у Злучаных Штатах.
14.15
Дыктатара Нікаласа Мадуру будуць судзіць у ЗША. Мадура «нарэшце паўстане перад правасуддзем за свае злачынствы». Пра гэта заявіў намеснік дзяржсакратара ЗША Крыстафер Ландаў.
13.25
У ЗША заявілі, што не панеслі страт падчас ваеннай аперацыі ў Венесуэле. Пра гэта паведамляе газета The New York Times. «Прадстаўнік ЗША заявіў, што падчас аперацыі амерыканскіх ахвяр няма, але адмовіўся каментаваць страты сярод венесуэльцаў», — гаворыцца ў паведамленні.
13.20
Улада ў Венесуэле павінна перайсці да віцэ-прэзідэнткі Дэльсі Радрыгес. The New York Times піша, што калі заява прэзідэнта ЗША Дональда Трампа пра захоп Мадуры пацвярджаецца, то, згодна з Канстытуцыяй Венесуэлы, улада ў краіне павінна перайсці да віцэ-прэзідэнткі Дэльсі Радрыгес, якая займаецца эканамічнай палітыкай.
13.15
Мадура быў захоплены «Delta Force», элітным падраздзяленнем спецыяльнага прызначэння Узброеных сіл ЗША. Пра гэта паведамляе крыніца CBS News.
12.40
Прэзідэнт ЗША Дональд Трамп абвясціў, што ў выніку аперацыі амерыканскіх сіл у Каракасе кіраўнік Венесуэлы Нікалас Мадура разам з жонкай затрыманыя і паветраным шляхам вывезеныя з краіны.
12.20
CBS News і Fox News са спасылкай на прадстаўнікоў адміністрацыі Дональда Трампа пацвердзілі інфармацыю пра ўдары Узброеных сіл ЗША па Каракасе. Агенцтва Reuters таксама спаслалася на неназванага амерыканскага чыноўніка, які заявіў, што за ўдарамі стаяць ЗША.
Афіцыйны каментар Злучаных Штатаў пакуль не паступаў. Белы дом апублікуе заяву па Венесуэле пасля таго, як амерыканскія вайскоўцы пакінуць яе паветраную прастору, перадала газета The Wall Street Journal.
12.10
ЗША нанеслі ўдар па Музеі рэвалюцыі ў Каракасе, дзе знаходзіцца маўзалей Уга Чавэса.
11.50
Выданне The New York Times паведамляе пра «знікненне» Мадуры. Дзе знаходзіцца кіраўнік Венесуэлы Нікалас Мадура, на дадзены момант невядома.
11.35
З'явіліся відэа, на якіх амерыканскія баявыя верталёты наносяць магутныя ўдары па мэтах у Венесуэле.
11.05
У сацсетках з'явіліся паведамленні, што Мадура быў эвакуяваны з палаца Мірафлорэс, афіцыйнай рэзідэнцыі.
10.50
На вуліцах сталіцы Венесуэлы пачаўся хаос. Жыхары спрабуюць на аўтамабілях пакінуць Каракас, у якім сёння прагрымелі мінімум 7 выбухаў.
10.49
ВПС ЗША атакавалі асабісты дом міністра абароны Венесуэлы ў Каракасе, пішуць мясцовыя СМІ.
10.45
Прэзідэнт ЗША Дональд Трамп загадаў нанесці ўдары па аб'ектах унутры Венесуэлы, уключаючы ваенныя аб'екты, піша журналістка CBS News Джэніфер Джэйкабс са спасылкай на заявы амерыканскіх чыноўнікаў.
Дыктатар Венесуэлы Мадура падпісаў указ аб увядзенні надзвычайнага становішча ў сувязі з атакай на краіну.
10.44
Сілавікі адганяюць людзей ад рэзідэнцыі Мадуры і важных аб'ектаў. У Каракасе пачалася паніка, людзі спрабуюць яго пакінуць.
10.42
Паводле папярэдняй інфармацыі, у Каракасе высаджаны амерыканскі дэсант.
10.40
На відэа трапілі магутныя другасныя выбухі пасля авіяўдару ЗША паблізу аэрапорта Ігуэротэ, штат Міранда, Венесуэла.
10.30
На вуліцах Каракаса з'явілася венесуэльская бранятэхніка, яе сцягваюць да прэзідэнцкага палаца.
CBS News піша, што прадстаўнікі адміністрацыі Трампа заявілі, што ім вядома пра паведамленні пра выбухі ў Венесуэле і верталёты над Каракасам.
The New York Times паведамляе, што прадстаўніца Узброеных сіл ЗША ў Вашынгтоне пацвердзіла паведамленні пра выбухі, але адмовілася каментаваць магчымую ролю Амерыкі ў гэтым.
Тым часам у сетцы распаўсюджваюцца кадры ўдараў па Каракасе, верагодна, ракетамі Tomahawk.
Тэлеканал Sky News Arabia сцвярджае, што абстрэлу падвергліся рэзідэнцыя міністра абароны Венесуэлы і порт у сталіцы краіны.
10.15
Над Каракасам таксама былі заўважаныя амерыканскія верталёты Chinook. «Гэта могуць быць удары ЗША», — піша выданне Clash Report.
Паводле Associated Press, у горадзе прагучала як мінімум сем выбухаў.
Bloomberg піша, што жыхары Каракаса паведамляюць пра гучныя выбухі і пралёт самалётаў над горадам, у выніку чаго ў многіх раёнах адключылася электрычнасць. У некалькіх раёнах горада таксама былі чутныя стрэлы.
На відэа, якія распаўсюджваюцца ў сацыяльных сетках, відаць успышкі і слупы дыму ў некалькіх месцах сталіцы Венесуэлы, а выбухі былі настолькі моцнымі, што трымцелі вокны і выклікалі кароткачасовыя адключэнні электраэнергіі ў такіх раёнах, як 23 дэ Энеро і паблізу авіябазы Ла-Карлота. На поўдні горада, дзе размешчаная буйная вайсковая база, знікла электрычнасць.
Мэтамі могуць быць ваенныя аб'екты, такія як Ла-Карлота або тэрыторыя паблізу палаца Мірафлорэс; выбухі бачныя як мінімум у шасці месцах.
Паводле паведамленняў СМІ, ЗША наносяць удары па порце Каракаса і востраве Маргарыта ў Карыбскім моры, дзе размешчаная вялікая колькасць вайсковых аб'ектаў.
Так, Clash Report піша, што ўдары прышліся па поўдні горада — раёне Форт-Тыуна і авіябазе генералісімуса Франсіска дэ Міранды. Таксама пад удар трапіла вайскова-марская база Ла-Гуайра ў штаце Варгас на поўначы краіны — там размешчаная акадэмія флоту.
Таксама ў сетцы распаўсюджваюцца відэа, на якіх заўважылі амерыканскія дэсантныя верталёты. У сваю чаргу ВПС Венесуэлы па трывоге паднялі знішчальнікі Су-30МКВ — іх накіравалі на перахоп амерыканскіх самалётаў і верталётаў.
Reuters паведамляе, што амерыканскія верталёты «атакавалі не менш як дзесяць аб'ектаў».
Паводле CNN, першы выбух быў зафіксаваны прыкладна ў 1:50 ночы па мясцовым часе. Некалькі раёнаў горада аказаліся абясточаныя, і журналісты CNN у сталіцы Венесуэлы маглі чуць гукі самалётаў пасля выбухаў.
На адным відэа, атрыманым і правераным CNN, відаць, як два слупы дыму падымаюцца ў начное неба сярод агнёў горада. У падножжа аднаго са шлейфаў можна ўбачыць аранжавае ззянне. Потым на кароткі момант бачная ўспышка ў іншым месцы, за якой ідзе глухі гул.
Венесуэльскія навінавыя агенцтвы Efecto Cocuyo і Tal Cual Digital паведамілі, што выбухі таксама былі чутныя ў штаце Ла-Гуайра на поўнач ад Каракаса і ў Ігуэротэ — горадзе на ўзбярэжжы ў штаце Міранда.
Паводле непацверджаных даных, у Каракасе высаджваецца амерыканскі дэсант.
Раней прэзідэнт ЗША Дональд Трамп неаднаразова заяўляў пра гатоўнасць правесці наземную аперацыю ў Венесуэле з мэтай прымусіць прэзідэнта краіны Нікаласа Мадуру пакінуць пасаду.
Сярод інструментаў ціску Вашынгтон разглядаў пашырэнне санкцый, узмацненне вайсковай прысутнасці ЗША ў рэгіёне, а таксама нанясенне удараў па судах, якія, паводле сцвярджэнняў амерыканскага боку, датычныя да незаконнага абароту наркотыкаў у Ціхім акіяне і Карыбскім моры.
У Пентагоне не далі неадкладнага каментара адносна падзей у Каракасе.
Канфлікт ЗША і Венесуэлы
16 снежня прэзідэнт ЗША Дональд Трамп абвясціў пра поўную блакаду падсанкцыйных нафтавых танкераў, якія заходзяць у воды Венесуэлы або пакідаюць іх.
Гэтым крокам амерыканская адміністрацыя імкнецца перакрыць ключавыя крыніцы фінансавання рэжыму прэзідэнта Венесуэлы Нікаласа Мадуры.
За апошнія тыдні вайскоўцы ЗША перахапілі два нафтавыя танкеры, тады як трэці карабель, які пераследавалі амерыканскія сілы, адвярнуўся ад венесуэльскіх вод і знік у Атлантычным акіяне.